El reló de M.L.

Llegó abenayá a les mios manes un reló de bolsu antiguu per vía familiar. Ye de color bronceáu y de cuerda. P'axustar la hora tien un botón a un llau qu'hai que cincar. Per detrás tien la tapa metálica y so ella otra de cristal que dexa ver la maquinaria. Llamóme l'atención que dientro d'ella hai como un espaciu onde asoma una pieza que recuerda a un péndulu ñarru que se xiringa col tic-tac. Ta usáu abondo y, cuando lu llevé a iguar a la reloxería porque nun funcionaba, dixéronme que tenía bien d'arregladures antigües yá.

Pero lo que me fexo entrugame por quién fuera'l so dueñu foron unes lletres grabaes na tapa posterior. Yeren una L y una M superpuestes, anque nun s'apreciaben nidies pola mor de lo gastada que taba esa tapa, pues como dixi enantes el reló tien traza de tar usáu bastante. De mano nun me cuadraba nengún nome conocíu de los mios antecedentes familiares, pela vía materna, que ye pola que me llegó, pa dar col amu d'aquel reló qu'aportare a les mios manes. Nun me cayera en baxo que les iniciales grabaes coincidien casualmente coles del mio nome (en castellanu) y el mio primer apellíu y rebuscaba nesi orde pa intentar encaxalu en daquién que'l nome y primer apellíu entamaren per eses lletres, pero nada.

El casu foi que pescudando un día nuna carpeta de documentos vieyos de casa que conservo cayí na cuenta qu'andaba envizcáu na interpretación correcta de les lletres. En realidá había que lleer primero la M y dempués la L y entós sí qu'encaxaba col nome y primer apellíu d'un hermanu de mio bisagüela materna (prefiero nun los dar, porque nun lo considero relevante pal casu). Tratábase d'un home que trabayare de maquinista nes dómines de les máquines de vapor y escurque fuere'l reló qu'usare nel trabayu y d'ehí que tuviere que lu reparar delles veces. M.L. casárase y tuviere un fíu, pero quixo la mala fortuna qu'esi fíu morriere ceo y dempués tamién la muyer. Arriendes de les llaceries anteriores, él carecía del aparatu respiratoriu y tuvo internáu en sanatorios. Nomó a mio bisagüelu con potestá pa llevar los sos asuntos. Morrió hacia los años trenta del sieglu pasáu, polo que'l reló tien d'andar alrodiu de los cien años.

Dempués d'igualu, pa lo que tuvieren que face-y dalguna pieza a costa fecha porque nun yeren a atopales qu'encaxaren pa ello ente'l material que teníen na reloxería, hoi funciona perfectamente. Tien un tic-tac tan sonoru que más qu'un reló de bolsu paez de paré con pendilexu. Écholu a andar de xemes en cuando, porque convién nun tener siempre paraes estes maquinaries antigües. Y pienso tamién nes casualidaes que nos presenta la vida: de llegar por casualidá a mi un reló vieyu y estropiáu que pudiere guapamente acabar na basura, fui a dar con quien fuere'l so dueñu pola casualidá tamién de tener unos documentos en casa u apaez él y por llevar, casualmente, grabaes na tapa trasera dos lletres que coinciden col mio nome y primer apellíu, pero al vies.

Ciertamente, nesta vida danse dacuando casualidaes que presten...

Añaes y alcordances

"Ea, ea, el carru cola yerba.
Vaya, vaya, el carru cola paya".

Na época cuando somos ñeños y rapazos va tresnándose'l formientu de la nuestra identidá.

Los xuegos, cosadielles, tradiciones culturales y la llingua qu'aprendemos neses dómines son les blimes con que vamos iguando'l nuestru ser.

Una identidá y un ser que van despintándose por aciu d'inmersiones culturales y llingüístiques ayenes que van aforoñando les nuestres primeres alcordances y enseñances llariegues.

Vamos asina, pasiquín a pasu, dexando de ser lo que fuimos pa camudar en seres distintos. Llegamos hasta a ver lo que fore raigón nuestru como daqué ayeno o endolcao na ñublina de lo inservible.

Pero sucede que, dacuando, quieren les circunstancies de la vida qu'un rellumu aporte hasta nosotros. La nuestra conciencia primera esconsoña del lletargu y vuelve los güeyos hacia lo más fondero de nuestro.

Ye entós cuando'l puxu de lo que fuimos allalantrón na nuestra vida vuelve con más fuerza endagora que nel mesmu pasáu.

Y produzse entós esi fechu maraviyosu que nos fai enfotanos hasta l'últimu aliendu en que los nuestros fíos y los d'ellos, y tola enfilandrada de nuevos retueyos de la nuestra castra, vuelvan a sentir l'afalagu de los sones d'aquella mesma añada qu'a nosotros nos cantaren:

"Ea, ea, el carru cola yerba.
Vaya, vaya, el carru cola paya".
................................................................

La cai La Merced de Xixón

La corporación xixonesa aprobó da-y el nome del que fora alcalde, José Manuel Palacio, a la cai La Merced de Xixón. La propuesta foi de Xixón Sí Puede y robláronla PSOE, IU y FAC.

Y armóse l'espolín. Vecinos y comerciantes opónense a lo que consideren un absurdu y un atropellu. Yo, ensin ser vecín del llugar, tamién lo considero asina.

Esta cai yá apaez documentada nel añu 1.702. La xente d'ellí de tola vida comenta que yá los sos antecesores familiares ñacieren nella. El nome ye de los más populares  y tradicionales de la ciudá xixonesa. Un nome históricu del callexeru de la Villa de Xovellanos.

Pa da-y un nome a una persona, cuando se trabaya de manera planificada, estúdiase qué nueves cais hai que bautizar y pónse-y el d'una. Evítase asina que  los ciudadanos tengan que cambiar les sos señes perdayures, arriendes de nun mancar sentimientos de naide.

Pero cuando se gobierna a golpe d'ocurrencia cométense patochaes como esta. Créase un problema onde nun lu había y fádiase a milenta vecinos. Como añadidura, fráyase un trozu de l'alcordanza colectiva de la ciudá.

El tema tien igua si se quier. Ponse-y el nome del ex alcalde a otra cai y resuelto. Pero pa ello hai qu'escuchar a la xente. Y que la clas política escuche a los ciudadanos quiciabes seya muncho pidir. 

Si nun se llogra caltener el nome a esta cai histórica xixonesa va ser una auténtica pena. Un pasu más nel camín del despropósitu políticu y del desaniciu cultural. Paga la pena denunciar la situación y rispir porque se dea marcha atrás nesti sinsentíu.

Baxen turbulentes les agües polítiques y nun sé si la ponte del sentíu común aguantará nesti casu. Oxalá que sí. Pero...

(P.D: La prensa recueye hoi martes, 17 de Payares, l'anuncia de la retirada de la propuesta del cambiu de nome de la cai La Merced por parte de Xixón Sí Puede. Poro, cabe esperar qu'esa cai, con más de tres sieglos d'historia, vaya siguir conservando'l nome nel futuru. Pues norabona).

 

Apuntes de la gueta

Escribía apocayá nesta bitácora que tamos nel tiempu les castañes. Hoi torno a facelo con unos apuntes sobre esta actividá tan prestosa de la seronda, esta estación que, quiciabes, seya de les más guapes del añu, coles viesques teñíes de milenta colores y los caminos tapizaos pola foyarasca.

La época de la gueta varía dependiendo de l'altura y orientación de los castañeos. Pero por poner unos finxos, vien a entamar a primeros d'Ochobre y pue espúrrise hasta pasada la primer quincena de Payares.

Pa dir a castañes hai que llevar una equipación mínima. Nun voi entrar en detalles, pero sí voi referime a dalgunos. Pa calzar, meyor qu'unes catiusques de goma, llevar botes de monte que protexan los todíos y unes polaines hasta la rodía. D'esta manera vamos poder adientranos per zones abegoses ensin mayor problema. El palu ye un complementu necesariu, pues vamos movenos per terrenos pindios y desiguales onde se pue esbariar. Pero tamién tien otra función, porque tapaes pola foyarasca y el morgazu queden oricios y castañes sueltes que podemos atopar removiendo esa cubrición con él. Otru elementu que convién llevar ye una gorra o sombreru pa la cabeza, pues anque'l sol nun asome en tola xornada, una rama baxera o un escayu puen raspianos la cabeza produciéndonos una pitera y faciéndonos sangrar. Una erbía tradicional son les morgaces y actualmente siguen siendo bien útiles pa garrar los oricios que tán pa contra la vera'l camín o ente la maleza y llevalos pa una zona abierta onde esbillaos y saca-yos les castañes. La mochila, el móvil, una ñavaya, tirites por si hai rozadures...cuando se trata de pasar una xornada caleyando pente la ñatura siempre ye conveniente alcordase de lo qu'encamienten los avezaos al senderismu: que val más dir equipáu por escesu que por defectu, por si hai dalgún imprevistu desafortunáu.

Metíos yá nel monte, convién tomar nota de lo que vamos observando nel castañéu col envís d'aprovechalo en prósimes visites. Dependiendo de la situación y la orientación unes castañales suelten los oricios ceo y otres son más serondes. Tampoco non toes dan el frutu del mesmu tamañu nin na mesma cantidá. Conocer pa qué zona empobinar a pañar, según el día del mes que vayas a guetar, pue evitate andar al debalu buscando ensin atopar gran cosa cuando a un tiru piedra pue haber otra persona enllenado la mochila tan guapamente. Siempre nos puen quedar unes castañales difíciles d'algamar por tar mui arrodiaes d'artos y felechos. Hai que tomar bona nota d'elles, pues n'acabando la época de la gueta, metíos yá nel mes d'Avientu, la vexetación que les arrodia queda achaplada y pue ser un momentu afayadizu pa llegar a elles. La cubrición vexetal fai de conservante de les castañes entrín y non van apodreciendo los oricios, como nes cuerries, y rebuscando ente ello podemos llograr una gueta adicional per eses dómines.

Pero nun too ye dir a enfonilar castañes p'amagostar o cocer. Una xornada en monte da pa esfrutar abondo de los paraxes per onde pasamos. Aprovechala pa espurrir les piernes y esparder de les preocupaciones cotidianes. Observar los árboles, los regatos, los paraxes que nos afalaguen la vista...Y nun hai qu'escaecer les setes. Si los díes previos a dir al castañéu llovió y les temperatures se caltuvieron altes podemos esfrutar de bien de cogordes, con una bona variedá de colores y tamaños, atopando dende les que xuxen del suelu a les que ñacen de los tueros de los árboles. Un espectáculu prestosu pa contemplar. También los animales puen danos sorpreses, dende aves a mamíferos. Anque nun ye recomendable cruciase con un xabalí, sí podemos ver dayuri'l so rastru cola tierra llevantada y castañes esmordigañaes. Hasta'l rebecu yá se dexa ver mesmo na antoxana de dalgunes de les nuestres poblaciones, pola mor del abandonu de les nuestres viesques.

Andar a la gueta na seronda ye una actividá pa espansionar prestosa y barata de realizar. Y tamién una manera de conocer esa Asturies rural que nos arrodia y que la cultura urbanita que nos endolca fai que bien de veces escaezamos perdiendo asina la oportunidá d'esfrutar de la bayura que nos ufierta. Conocela ta al nuestru alcance si queremos molestanos en facelo.

 

    

La entepierna del canguru

Ñavegaba yo ayeri pela rede d'internet cuando atopé dellos enllaces que llevaben a una mesma información. Unos monederos australianos de canguru. Pero lo destacable ye que taben fechos cola coyonera del animal en cuestión. A lo que paez véndense como suvenir pa los turistes. Vamos, que lo mesmo qu'un turista que visita Asturies pue llevar como recuerdu una miñatura d'un horru, una gaita o unes madreñes col llema "Recuerdo de Asturias", un viaxeru a les antípodes pue tornar con un monederu fechu col escrotu d'esti marsupial cola so figura grabada nél pa garantizar procedencia y autenticidá.

Pero lo que más  me llamó l'atención foi la reacción esprecetada de dalgunes persones. Diba dende los que lo calificaben como daqué porcaz hasta quien empobinaba pel camín de calificar tal corexa como propia d'un regustu morbosu sexual y coses asina. Entruguéme yo entós si esta xente escandalizao pararía a pensar que, dende los tiempos más remotos hasta l'actualidá, llevamos los humanos usando les pelleyes de los animales pa facer taparrabos, capes, gorros, zurrones, zamarres, botes, zapatos, bolsos...y monederos ente milenta artículos más. Y, arriendes d'ello, comemos la carne de los animales esfollaos y hasta los güesos echamos nos potaxes chupándo-yos con prestancia  la cañamina.

Pero tirando del filu gastronómicu inda hai más. Porque nesti Estáu que compartimos con otros pueblos tenemos llugares onde avecen a cocinar los tolanos de ciertos animales, guisu que llamen de "criadillas". Asina, de la mesma manera que nun chigre asturianu te puen poner unos bollinos preñaos o unes cacagüeses pa espeñicar mentes tomes daqué, notros llaos puen ponete los perendengues reproductores d'un animal buscando la to aprobación mentes los metes na boca pa rucalos como si fueren ablanes. Entrúgome entós yo ú ta la diferencia moral o ética ente comer les partes ñobles d'un herbivoru cuadrúpedu o facer un monederu cola entepierna d'un marsupial bípedu, porque por más que furo nello nun l'atopo.

Yo pémeque estes coses esplíquense guapamente acudiendo a les diferentes cultures qu'hai ente los pueblos d'esti mundu traidor. D'esta miente, trazos culturales qu'a nosotros nos puen dar perceguera son corrientes notros sitios y, al vies, coses que consideramos razonables dexen plasmaos a los d'otros llugares cuando nos visiten. Por poner un exemplu, a nós danos repunancia contemplar cómos hai sitios onde comen insectos turraos o hasta simplemente un guisu de cascoxos, pero tamién nos visita xente qu'arremiella los güeyos cuando nos ven comer oricios o llámpares, porque ellos considérenlos animales non comestibles.

En fin, qu'un asuntu como'l d'unos monederos fechos cola bolsa au lleven los tolanos los canguros machu tien la so migaya. Pero voi dexalo tar equí, porque nun me gustaría que, por enrollame enforma coles coyoneres d'estos marsupiales, se vos hincharen les...paciencies a los llectores d'esta bitácora. Si acasu encamentavos que si dalgún conocíu vuestru que tuviere peles antípodes australianes vos invita a una copa y a la hora de pagar saca un monederu d'estos, nun torzáis el focicu, nin refugués la invitación, nin lu miréis como si tuviere grilláu, que la cosa nun ye pa tanto. Y per hoi más nada. Haxa salú y hasta la entrada que vien.