Frikillingüismos.

Lleo ayuri un llamamientu pa facer un grupu de xente pa  practicar  y ameyorar la fala n'asturianu. El motivu pa ello plásmame y clísame, pues ye'l de que nun hai sitios nenyures pa poder facelo.

Una interpretación de lo anterior pue ser que pa practicar l'asturianu estándar sedría bono formar grupos pa tala xera. La falta de difusión d'esi modelu estandarizáu podría emburriar a soluciones d'esti tipu pa deprendelu y espardelu.

Pero tamién pue dase otra interpretación que, supongo, ye toa una invitación pa los que s'oponen a la normalización d'esta llingua pa tirar los sos carrobexazos escontra d'ella.

Esa otra interpretación ye que l'asturianu yá nun se pue sentir en sitiu dalu y, polo tanto, los pocos que lo saben habríen d'aconceyase pa practicalo. Taríamos entós dando por muertu esti idioma a nivel de fala patrimonial y, entós, ún de los sofitos básicos pa la so reivindicación como ye'l que sigue vivu güei, quedaría inutilizáu.

Como nun toi nel pelleyu de quien propón eses iniciatives nun puedo afirmar nin negar cuala de les dos posiciones ye la correcta, pero sí anotar que pue llevar a situaciones nada deseables pal futuru del idioma, polo que considero mui peligroso dexales cayer per ende  ensin considerar esa ambigüedá a que dan llugar y el dañu hacia'l propiu procesu de normalización llingüística asturianu que pudiere provocar un plantegamientu ambivalente.

Lo cierto ye que, anguaño, la llingua asturiana vive y podemos atopala dende estaos bastante espurechos (esa xente que dicimos que fala zarrao) a toa una montonera de formes mecíes cola castellana, dende situaciones en que prima muncho l'asturianu a les que lo fai perpoco. Y, por supuesto, una parte importante de la población que yá ye de fala castellana dafechu.

Pero'l casu ye que tovía se siente falar n'Asturies y aquella persona que quiera conocer y practicar asturianu (resalvando'l modelu estándar) enagora pue facelo si s'aveza a afinar la oreya y escuchar. Y tamién hai llugares onde se puen usar bien de pallabres y espresiones que conocemos. Pa ello ye necesario salir a la cai, somorguiase nos ámbitos afayadizos, percorrer los nuestros llugares y echar parrafaes con toa esa xente que tovía nun escaeció esti vieyu idioma nuestru. Poniendo l'atención pertinente, seguro que vamos deprender, inda na actualidá, coses de la llingua asturiana que desconocíamos.

Lo que pasa tamién ye que l'apreciu pola fala usada polos falantes patrimoniales del idioma ye dacuando refugada dende dientro por una parte de la xente enfotao na normalización del mesmu. Contraponse a vegaes lo que ye idioma culto de lo dialectal, considerando esto cabero como daqué menor. Y yá nun digo nada de los falantes del llamáu "amestao", aperrillaos y hasta ridiculizaos davezu por esa  xente que piensa qu'apostrofando de viciu per delantre y per detrás yá ta aseguráu'l futuru de la llingua. Pero ye precisamente esi usu dialectal -amestao incluyíu- el que caltién viva esta llingua nuestra y la que mamemos y siguen mamando, afortunadamente, munchos asturianos. Ello, sobra dicir, nun habría de contraponese gota con deprender y usar un modelu estandarizáu, que ye lo qu'ocurre con milenta d'otros idiomes. 

Tengo la impresión de qu'hai xente vinculao a esi procesu normativu del asturianu qu'anda fuera bolos davezu. Que nun s'entera muncho del asturianu que se fala anguaño nesti país, y que se comporta con él como si fuere una llingua estranxera, afayadiza pa frikillingüismos, pa analizala como una cobaya de llaboratoriu, o pa enchipase como una nueva élite cultural cosmopaleta. Y cuando se zapica neses piedres, puen surdir propuestes y plantegamientos d'interpretación duldosa o que, directamente, puen convertise nun auténticu búmeran contra la propia llingua a defender.

¿Pitu o pita?

Esa imaxe d'un rapacín metíu nun cuartu y arrodiáu d'aparatos llétricos y pantalles nun nos fincó a los que fuimos neños acuantayá. Naquellos tiempos esporpollaben tou tipu de xuegos que facíes na cai. L'escondite, saltu y arroba, tres marinos a la mar, el pinchu, el pañuelín, a Roma, el lirio-lario, el cascayu o castru, la goma, los banzones o gua, les fiches, la peonza, a facer gomeros... O convertise en músicos impovisaos con riqui-raques, zamploñes d'alcacer, berrones o cornetes, xiblatos afuracando güesos de piescos... Visto ello güei, paez mentira que pudiéremos entretenemos con xuegos que, en dellos casos, yeren lo más cenciello que se pueda imaxinar. 

Como lo de xugar a pitu o pita. Pa ello, cuando pela primavera o'l branu granaben les plantes que formen los praos, garrabes el tallu d'una que tenía la espiga yá cola semiente formada (en zurrón, que se diz). Entrugábes-y a los amigos si queríen pitu o pita a manera d'acertixu. Dempués esnidiabes los deos índiz y pulgar pel tallu p'arriba hasta que te quedaba la grana garrada nellos. Si esa grana tenía forma arredondiada, yera pita, y si quedaba la picorota de la espiga destacada y bien visible yera pitu. Y el qu'acertare, pues acertao quedaba, y si permediaba dalgún tipu d'apuesta, ganada quedaba. 

Nun sé yo si a los rapacinos d'esta dómina que tamos-yos fadría muncha gracia dexar los sos aparatos llétricos con pantalles, mandos y botones y ponese a enredar con trebeyos d'aquella otra época. Pero nuca se sabe. A lo meyor, si tuvieren ocasión de prebar, igual-yos prestaba pola vida...

Asturianos: de fidalgos con montera a vasallos en porrica

Les tierres del norte peninsular tuvieron d'antiguo l'aquello de considerales llugares de fidalgos. Allá pel sieglu XVI nada menos qu'un 80% de la población asturiana considerábase d'esa condición, magar una bona parte d'ello viviere cola corexa fecha una llaceria.

Escurque foi esa una de les causes pola qu'en tiempos pasaos los asturianos llevaben a gala nun quitar la montera en sitios zarraos, como por exemplu nos oficios relixosos na mesma ilesia. Tuvo que permediar la ordenanza pertinente pa obligar a los antiguos a quitar la montera nesos llugares. Y empicipiemos entós los asturianos a quitala, resalvando al gaiteru que, como reliquia de tiempos casi remotos yá, sigue anguaño con ella puesta.

Y a lo meyor foi esi'l principiu d'una serie de llaceries posteriores. Entamemos quitando la montera. Dempués a reínos de los vezos culturales nuestros, a refugar la propia llingua y asina sucesivamente hasta aportar a güei en qu'andamos práuticamente en porrica. Porque esto cabero ye lo que nos ta asocediendo actualmente. Tamos siguiendo amomiaos lo que nos manden perdayuri, por fato que pueda ser, al empar qu'abandonando o refugando lo propio, y quedando desnudos y albintestate. Comprobando empampirotiaos cómo apodrigaña tolo nuestro. Cómo vamos, día a día, quedando ensin país.

Asina que de ser tierra de fidalgos arguyosos de llucir la tiesta cubierta cola montera pasemos a convertinos nuna xermandía de vasallos coritos y escorrexaos por tou quisqui que fixe los sos oxetivos destructores en nosotros y na nuestra patria asturiana. Esta ye la situación actual au tamos y el futuru que podemos acolumbrar nel finxu'l cielu. Y too emprimó por un xestu que, quiciabes, paeciere entós ensin mayor relevancia. Aceutando vezos y órdenes foriates y quitando un día la montera...

Morriendo de salú

Diben los caballos cargaos colos pelleyos de vinu a distribuilos pelos chigres.
 
Diben coles llecheres vendiendo lleche catao recién peles cases.
 
Diben coles carruches y baldes de sardines y pescao a vendelo pregonándolo a voces: ¡sardines fresquines!.
 
Diben al mercáu con aquellos quesos fresquinos que te vendín les paisanines endolcaos en fueyes de berza y tresnaos na casería, y que daba gloria tastialos...
 
Pero llegaron los grandes intereses y toa aquella xente estorbábalos. Sobraben. Yeren una estorbisa pal negociu. Había que los echar.
 
Entós los mandones prohibieron lo pelleyos de vinu, les llecheres vendiendo lleche catao recién, les sardineres pregonando'l pescao acarretao de la rula, y la venta de quesos fechos na casería.

Porque too ello representaba un gran peligru pa la nuestra salú.
 
Agora papamos salú a esgaya en forma de colorantes, conservantes, anilines... y toa una carrapotada de metralla química. Una salú mui moderna y mui beneficiosa... pa dalgunos. 

Entós anguaño morremos refalfiaos de "salú".  Pero, eso sí, mui llegalmente.