jueves, 31 de diciembre de 2009

Siempre quedamos nel cántaru.


Fina un añu vieyu y pica a la puerta otru nuevu. Doce meses que son una nueva oportunidá pa iguar lo desiguao y pa intentar llantar el ramu en dalguna andecha de les pendientes.

Poques hores falten pa que'l guirria y los xinetes aguilanderos cumplan cola tradición allá per Ponga, averándonos asina esi caricós encesu de les nuestres tradiciones más ancestrales.

Tamién na viéspora que ye güei cúmplese con otra tradición. La d'echar nun cántaru papeles colos nomes de mozos y moces del llugar pa sacalos emparexaos. Pero dalgunos van quedar en cántaru, que nun cuadren los xuncimientos pa toos.

Quedar nel cacíu por aciu de la fortuna nun tien remediu dalu y queda resignase namás.

Lo malo ye cuando se queda por voluntá propia. Por un deséu absurdu de buscar la soledá y abellugar no escuro, no invisible.

Y esi ye ún de los nuestros principales problemes. Préstanos quedar nel cántaru escondíos de la mano del destín que vien ser como nun querer dir nenyures.

Si pa esti añu que va entamar en poques hores punxéremos la voluntá y l'enfotu de salir a la lluz y facenos d'una vegada visibles, sedría una de les mayores y meyores noticies que nos podríamos regalar.

Y esa posibilidá depende, en bona midida, de nosotros.

miércoles, 23 de diciembre de 2009

Feches navidiegues.


Pa dellos ta acabante celebrase'l solsticiu d'iviernu. El finxu que marca'l momentu en que'l sol torna a nacer y entama a apoderar a les tenebres allumando un nuevu ciclu de la vida.

D'otru llau, ta a piques de celebrase la navidá cristiana. Tamién un asocedíu alredor del nacimientu y de la vida.

Son les feches navidiegues afayadices pa reunise la familia, charrar, armar folixa, reencotrase.

Anque tamién son feches murnies p'aquellos que tienen na alcordanza la pérdida de seres cercanos, de familiares tamién. Nesti casu la folixa camuda en remembranza con tastu amargu.

Ye ferial d'estes dómines facer llamamientos a l'amistá, la paz, o la hermandá. Quiciabes el posu cristianu fai que la nuestra conciencia nos afale a actuar de manera menos gafa que'l restu l'añu, poniéndonos esi comportamientu a manera de penitencia. O a lo meyor tamién s'amiesten equí actitúes solidaries de tiempos peralloñaos.

Caleyamos yá pel iviernu, la estación au nos vieyos tiempos más abegosa yera la subsistencia. Cuando nun daben la tierra nin los árboles. Cuando abellugaben los animales. Cuando'l fríu tarazaba y la muerte achisbaba. Quiciabes esti obleru siga espetáu nel nuestru más fondu subconsciente. Entós acuruxamos, buscamos y recibimos ayuda, pidimos y apurrimos l'aguilandu.

Nestes dómines empecipiaben tamién les mazcaraes d'iviernu, anguaño tan escaecíes, que nos facíen recular nel tiempu a mecenos colo ancestral, rebuscando'l nuestru raigón, el vieyu aniciu.

Feches y fiestes navidiegues. Onde se mez lo cristiano y lo pagano. U s'amiesten l'allegría y la tristura. Onde nacen dioses solares o humanos. Onde s'ornia l'arbol paganu cabo'l nacimientu cristianu, y s'alluga l'arfueyu na puerta casa nun arrogante somantu de sincretismu. Tiempu amañosu pa celebrar la xuntanza del clan familiar y de la tribu nacional.

Otramiente, un tiempu bonaz pa los deseos y les esperances. Yo confórmome con ún deséu: que de güei nun añu sigamos tando. Y con una esperanza: que de güei nun añu continuemos siendo.

miércoles, 16 de diciembre de 2009

Patente d'españolidá.


Col nuevu sistema políticu arreyáu a l'aprobación de la Constitución cambiaríen bien de coses, nun digo yo que non. Pero hai dalguna que sigue esautamente tal como taba, o polo menos eso ye lo que paez. Talmente como si nun hubiere manera d'atopa-y igua.

Y ello ye que'l discursu qu'utiliza abonda xente n'Asturies, a la hora de definir y defender lo español, sigue siendo, en munchos casos, ximielgu al que remanaben antiguamente cuando la dictadura. Un discursu onde a la primera sáltente coles babayaes consabíes:

"Eso de la llingua ye un inventu. L'idioma d'Asturies ye l'español."

"Yo con esa xente que fala raro (por catalanes y vascos, principalmente) nun quiero saber nada. Yo soi español."

"Los asturianos nun necesitamos autonomía. Eso pa los separatistes. Nosotros somos españoles."

¿Quién nun escuchó dacuando coses como estes o otres milenta que podríamos poner sacaes de los temes más variaos?. Son el pan de tolos díes. Un discursu identitariu ranciamente español y preconstitucional al empar. Pa ellos Asturies ye'l bierzu d'España y la mapa del casticismu y olé. Pa ellos cualquier autonomía con puxu estatutariu y otra llingua oficial arriendes del castellanu ye un ñeru d'antiespañoles separatistes. Pa ellos l'uniformismu políticu, identitariu y llingüísticu son el megollu del so pensamientu únicu y verdaderu.

Asturies ta llarada d'esti tipu xente. El que nun lo vea ye que nun tría la cai. Porque basta con salir ehí fuera y poner la oreya pa comprobalo. Tamos arrodiaos d'individuos que piensen qu'esti Estáu ye monollingüe y que tolo que nun seya falar castellano ye antiespañol. Una xente que sigue pensando qu'esti Estáu tien una única demarcación territorial y qu'eso de les autonomíes ye ermuno d'antiespañoles y antipatriotes. Y que falar asturiano ye de parrulos montunos, y lo qu'hai que facer ye adeprender bien el castellano y l'inglés pa poder andar cola cabeza bien alta y española pel mundu.

Y cuando se fartuquen d'esprecetase contra tolo que se ximielga delantre los sos güeyos roxigualdes y dalguién, más fartucu qu'ellos d'aguantalos, retrúca-yos tanta bocayada, queden más pálidos que si los chupare la guaxa, arremiéllense nel interlocutor incrédulos, y a bastantes d'ellos vien-yos el so mundu monolíticu patrioteru embaxo y queden hasta ensin voz. Porque, esa ye otra, la mayoría d'esta xente son unos pininos ensin xixa nin chapeta amantes de falar al alto la lleva pensando qu'asina sienten cátedra. Tarambaines que confunden la educación espartana de los que los aguanten con que tol mundu piensa como ellos, y nun son a imaxinar qu'heba otru discursu nesti Estáu estremáu al de so.

Pero ehí los tenemos rabotiando. Ensin empapase de nada por más años que pasen. Falando tan campantes de democracia, llibertá, y nun sé cuantes coses más, ensin enterase de la misa la media. Declarándose defensores de la Constitución, ensin pescudar nin molestase en facelo, lo qu'ésta diz al respectu de les llingües o de la organización territorial. Cola so cruzada de chigre, moxiganguera y faltosa, contra los qu'ellos creen que nun s'axusten a lo español nin territorial nin cultural, nin llingüíticamente. Porque la patente patriótica española tiénenla ellos. Faltaría más.

jueves, 10 de diciembre de 2009

L'Arte Asturianu como metáfora.


Pal Arte Asturianu o Perrománicu Asturianu cuerren malos tiempos.

Pues el casu ye que lléguennos nueves anuncies del so abandonu y del desinterés por curialu d'aquellos que debieren. En definitiva, lo de siempre.

Pa más inri los sos monumentos formen parte de la declaración de Patrimoniu de la Humanidá. Vamos, que ye como si fuéremos depositarios d'una ayalga cultural pa los güeyos del mundu.

Pero nin con eses. Nin siquiera funcionamos a esi nivel tan básicu. El desdexamientu anubre de finxu a finxu esta tierra. Ye xeneral y algámalo too.

Tal paez que lo que pueda pasar con esti patrimoniu fundamental de la nuestra cultura ya historia nun-y importare a naide. Nin a les instituciones polítiques, nin a les relixoses, nin a los partíos, nin al mundu la cultura, nin a la xente...

A naide. La situación de desamparu del Arte Asturianu, del Prerrománicu de nuestro, supón una metáfora auténtica de lo que güei ye Asturies:

L'abandonu y la deserción xeneral de la nuestra propia identidá. La falta de chapeta. L'ausencia de vergoña. La vocación decidida de nun ser naide.

martes, 8 de diciembre de 2009

Señor Conde Campumanes...


Conocer les nuestres lletres más vieyes siempre apurre dalguna enseñanza. Unes veces sirven de complementu p'adeprender meyor la nuestra llingua. Otres, pa esfrutar del so tastu lliterariu. Hai casos en que son auténticos "periódicos" de la dómina. Y tamién nos ufierten datos de cómo se les arreglaben acuantayá pa plasmar nel papel la llingua oral, coles sos vacilaciones, duldes, etc. Hai tiempu que tengo'l rixu de poner nel pergamín un testu vieyu. Y como la bloguesfera ye abondosa en comentarios anónimos, blogues amazcaraos, nomatos, etc., pues paecióme amañosu un testu de 1.781 (¡228 añinos d'antigüedá namás!) manuscritu anónimu y sacáu de la edición facsimilar de 1.990 que d'él sacare l'Academia de la Llingua Asturiana. Son 694 versos que, evidentemente, nun voi copiar equí. Pero pa que veais ver per ónde va la cosa los que nun lu conozáis, voi allugar un puñáu del entamu y otru del final. Ehí vos los dexo:

Señor Conde Campumanes/cuyu ñombre tantu estruendu,/fai en todes les ñaciones,/de unu y utru emisferiu,/que lles que moren al cabu,/del mundo, el sabiu Européu,/vos apelliden, y otres,/el Salamon disti tiempu,/áquian nusu Rei don Carlos,/lluego desque empuñó el zetru,/Escoyó por so abogadu,/porque ya entós tenis creitu,/del mas doctu, y bon lletradu,/que safayaba ñel reinu,/ya quian fexso desapues,/en el xuzgadu supremu/(.............................................) so amor al rerviciu regiu;/llu facia de Campumanes/Conde, enteramente, essemptu,/de media anata y de llances,/á illi y al so herederu,/yá quantos viniesen dilli/desdequi al xsuiciu postreru./Despidiose entos llamigu/y ansí que ñon quedé serenu;/de gozu que me dió oillu,/ñon me cavia llalma en cuerpu./Enfin sea por munchos años,/Señor Conde, y vuestru neñu/herede vuestra vertu,/lla gloria, y condadu vuestru/con munchu bien de fortuna,/yá lla postre el bien eternu. Amen.
Madrid, Hoy 20 de1781 años

lunes, 7 de diciembre de 2009

Recordatoriu.


Enguedayaos que tamos en si somos d'izquierdes, de dereches o cuartu y metá.
O si somos nacionalistes españoles o asturianos o cuartu y metá.
O si nos axuntamos, o si nos dixebramos o cuartu y metá.
Enguedeyaos que tamos nes nuestres espiriques perimportantes y bla-bla-xu-xu...
Escaecemos qu'hai una activista saharaui llamada Aminatu Haidar en fuelga fame que pue perder por aciu d'ello la so vida pa reclamar los derechos básicos y reconocíos en toles cartes y trataos internacionales d'esti pueblu reprimíu ya invadíu.
Sofitada por una llexón de ... quince solidarios. Poniéndo-y un nuedu en gargüelu al Gobiernu Español que se plantega alimentala escontra la so voluntá pa salvar los trastos más que por salvala a ella. Ante una indiferencia ablucante de bien d'organizaciones y xente qu'ayeri mesmo s'esprecetaben colo de la defensa de los derechos de les persones y de los pueblos...
Yo, el casu d'esta muyer, faime de recordatoriu que, la base pa cualquier posibilidá d'ameyorar nel futuru en cualquier estaya d'esta vida, pasa por nun escaecer dalgo tán básico y fundamental como ye, ante too, ser persona.
Ante tanta incomprensión y intereses de toa mena, deséo-y daveres lo meyor, que ye, agora mesmo, que salve la so vida.

domingo, 6 de diciembre de 2009

Armar la danza.


Resulta cafiante repitir davezu lo mesmo. Pal que lo escribe y pal que lo llee. De toles maneres, cuando apaez dalgo nuevo nun ta de más referise a ello.

Estos díes produxéronse dos fechos, dos movimientos, interesantes.

D'un llau el comunicáu emitíu a comuña pol PAS y AA alrodiu de les selecciones deportives nacionales asturianes.

D'otru llau la editorial de "Pola Xuntanza" abriendo la propuesta d'algamar alcuerdos a tol abanicu nacionalista/asturianista col envís de que nin ún sólu asturianu esmolecíu por esti tema pueda sentise escluyíu o apostalgáu.

La propuesta pola qu'abondos ciudadanos naguamos cuantayá de llegar a alcuerdos de mínimos ente les diverses fuerces polítiques d'ambitu asturianu col oxetivu d'algamar representación na Xunta Xeneral nes prósimes autonómiques ta abierta dafechu.

Como lo que se propón ye respetar la independencia de cada fuerza política y, al empar, sentase a dialogar hasta llograr unos alcuerdos mínimos (por exemplu nel tema de la oficialidá y del autogobiernu), poniendo ganes y voluntá debiere ser posible.

L'añu 2.010 ta yá picando a la puerta. Y va ser clave nesti procesu. Tiempu hai per delantre pa facer les coses a modo y llantar finxos aceptables por toos.

Aportó la hora de comprobar los que tán pol llabor d'armar la danza y los que siguen encerrizaos en convertise en "referentes" qu'enxamás van dir más allá de l'antoxana de la propia casa.

Esperemos qu'esi patriotismu asturianu necesariu pa llevar a bon puertu esta xera y que la visión en "clave nacional" y non en "clave tribal" de la política nacionalista/asturianista s'impongan pol bien de toos. D'absolutamente toos ensin esclusiones.

A partir d'agora, lo que tamién va quedar rescamplando ye qu'aquellos que s'enfoten en romper la danza van facelo a la vista de toos y les xides que muestren como xustificación a la so actitú van resultar yá imposibles de creyer.

viernes, 4 de diciembre de 2009

El rixu pola censura.


El baturiciu yá entamó y ruxe abondo. El motivu, esi anteproyectu de llei d'Economía Sostenible u s'inxertaría la creación d'un muéganu, al marxe del poder xudicial, pa esbillar qué páxines web cumpliríen o incumpliríen la normativa, pudiendo ser pesllaes nesti últimu casu.

Darréu del alderique entamaron les declaraciones contradictories nel Gobiernu. Agora, d'un llau sopelexen que tendría qu'intervenir, de toes toes, el poder xudicial pa trancar cualquier páxina web, d'otru que de lo plantegao nun va haber nada. En resumíes cuentes, tamos nesti intre somorguiaos nuna auténtica ceremonia de la confusión. Y como remate, comenten en círculos políticos qu'esiste anguaño una normativa europea que valtaría l'inxertu en cuestión.

Yo toi del llau d'una corriente d'opinión que camienta que too esto arreblaga en realidá más allá que de tratar de protexer los derechos d'autor. La rede d'internet ye una llambiotada que peta a les grandes formaciones polítiques. La griesca pol control de medios de comunicación de toa mena tenémosla ende tolos díes: televisiones, radios, prensa, etc. Namás que s'esmuz per agora a esi control la rede d'internet que funciona como una islla de llibertá nuna mar de d'adhesiones ya intervencionismos. Asina qu'encétase la rede pola mor de los drechos d'autor y acaba diéndose más allá abriendo o pesllando puertes (web) sigún comulguen col poder o lu critiquen.

Col pasu los díes vamos ver en qué para en realidá la cosa. De toles maneres, sería peligroso face-yos casu a los cantos de serena de les últimes hores que dende medios gubernamentales nos encamienten que foi too asemeyao a un error. Pues non. Foi too premeditao y conocío pol Gobiernu, magar echaren per delantre a la ministra Sinde como si los demás nun tuvieren al tantu de nada. El malfadiáu anteproyectu ye claramente una manera de resucitar la censura reculando asina a tiempos preconstitucionales. Baxar la guardia sedría de fatos. Los qu'utilizamos esti mediu d'espresión llibre que ye internet tenemos que tar, pola cuenta que nos trai, siempre sollertes. Independientemente de quien gobierne. De xuro que los intentos de control de la rede nun van parar ehí.

jueves, 3 de diciembre de 2009

MANIFIESTU EN DEFENSA DE LOS DERECHOS FUNDAMENTALES NA REDE INTERNET


Cola inclusión nel Anteproyectu de Llei d'Economía sustentable de modificaciones llexisllatives qu'afecten a la llibre execución de llibertaes d'espresión, información y el derechu a la cultura al traviés d'Internet, los periodistes, blogueros, usuarios, profesionales y creadores d'internet manifestamos la nuestra oposición arrecha al proyectu, y declaramos que:

1. Los derechos d'autor nun se puen asitiar penriba de los derechos fundamentales de los ciudadanos, como'l derechu a la privacidá, a la seguridá, a la presunción d'inocencia, la tutela xudicial efectiva y a la llibertá d'espresión.

2. La suspensión de drechos fundamentales ye y debe siguir siendo competencia esclusiva del poder xudicial. Nun se zarra ensin sentencia. Esti anteproyectu, escontra lo establecío nel artículu 20.5 de la Constitución, pon en manes d'un muérganu non xudicial -un organismu dependiente del Ministeriu de Cultura- la potestá de torgar a los ciudadanos asturianos y españoles l'accesu a cualisquier páxina web.

3. La nueva llexislación va crear inseguridá xurídica en tol sector tecnolóxicu asturianu y español, perxudicando una de les poques estayes de desendolcu y futuru de la nuestra economía, torgando la creación d'empreses, introduciendo pilancos a la llibre competencia y acuartando la so proyección internacional.

4. La nueva llexislación propuesta amenaza a los nuevos creadores y torga la creación cultural. Con Internet y los sucesivos avances tecnolóxicos democratizáronse de forma granible la creación y la emisión de conteníos de toa mena, que yá nun vienen principalmente de les industries culturales tradicionales, sinón d'abondes fontes estremaes.

5. Los autores, como tolos trabayadores, tienen derechu a vivir del so trabayu con nueves idegues creatives, modelos de negociu y actividaes asociaes a les sos creaciones. Intentar caltener con cambeos llexislativos una industria obsoleta que nun sabe adaptase a esti nuevu entornu nun ye xusto nin realista. Si'l so modelu de negociu se basaba nel control de les copies de les obres y n'Internet nun ye posible ensin vulnerar los derechos fundamentales, debieren buscar otru modelu.

6. Consideramos que les industries culturales necesiten pa sobrevivir alternatives modernes, eficaces, creíbles y asequibles, y que s'afayen colos nuevos usos sociales, envede llimitaciones tán desproporcionaes como ineficaces cola fin que dicen perseguir.

7. Internet tien que funcionar de manera llibre y ensin interferencies polítiques agospiaes por sectores que pretenden perpetuar modelos obsoletos de negociu y imposibilitar que'l saber humanu siga llibre.

8. Esiximos que'l Gobiernu garantice por llei la neutralidá de la rede n'Asturies y n'España, ante cualisquier presión que pueda producise, como marcu pal desendolcu d'una industria sostenible y realista de cara al futuru.

9. Proponemos una verdadera reforma del derechu a la propiedá intelectual orientada a la so finalidá: devolver a la sociedá el conocimientu, promover el dominiu públicu y llimitar los abusos de les entidaes xestores.

10. En democracia les lleis y les sos modificaciones deben aprobase tres l'oportunu debate públicu y teniendo que consultalo previamente a toles partes implicaes. Nun ye de recibu que se faigan cambeos llexislativos qu'afecten a los derechos fundamentales nuna llei non orgánica y que finca otra materia.

NOTA: Esti manifiestu foi redactáu conxuntamente por periodistes, blogueros ya internautes, nuna sesión maratoniana durante la tarde-nueche del día 1 d'Avientu. Si tas d'alcuerdu sopeléxalu tolo que puedas.
..........................................................................................................................
Roblamos y sofitamos a comuña esti manifiestu los blogues:
El Gorrumbu'l Torruxón
Mimi de Ribono
Fazañes Béliques
El Copilotu de Pinín
Nagh el Troglodita
El Xanu'l Caborniu

Asturies, a 3 d'Avientu de 2.009

martes, 1 de diciembre de 2009

Salir de la caverna.


Delles veces dame por pensar en coincidencies curioses. Como, por exemplu, que'l nacionalismu/asturianismu de la nuestra época tien una antigüedá asemeyada a la esperanza de vida de los neanderthales: alredor de trenta años.

Y, curiosamente como nel so día pasare con esta castra, afayámonos nun momentu delicáu pa la nuestra pervivencia futura. Ye abondo la xente que ve'l futuru prietu, enforma desmotivao, dalgunos yá tiraron definitivamente la toalla, y dalgunos otros que nagüen por cambios o rectificaciones claros de la trayectoria actual.

Encamentando de mano la dificultá que tien resalvar la fuérciga que separta los plantegamientos teóricos de les plasmaciones reales de los mesmos, quiciabes los partidarios de cambios claros tengan razón y seya'l momentu de camudar les nuestres erbíes poco práctiques por otres más acordies colos tiempos actuales. De salir de la caverna tenebrosa y desconocida na que tamos tovía pa bona parte de la sociedá pa presentanos a los güeyos del tol mundu como un movimientu atractivu, ilusionante, y alternativu a lo qu'hai.

Xugar a empixar a la historia pue resultar altamente peligroso. Na intelixencia qu'apliquemos, como colectivu, a les decisiones d'anguaño pue tar la diferencia ente afitanos definitivamente cara al futuru, o de convertinos nunos restos históricos frañucaos que sirvan d'oxetu d'estudiu a los paleontólogos sociales que pescuden nel so día los aconteceres d'estes dómines.

miércoles, 18 de noviembre de 2009

Falar pa nun falar.


Últimamente paecen guañar los discursos tapecíos. Eses espiriques onde se fala o escribe pa nun dicir nada.

Son too suxerencies, amagos, coses que se dicen saber y nun se dicen...

Pescudar pelos medios de comunicación, o navegar pela rede, ta convirtiéndose en daqué abegoso, porque acabes fartucándote de lleer y al final daste cuenta que nun t'enteraste de nada.

Si falamos del nacionalismu o asturianismu hai que lo facer claro. Y si falamos de la llingua o de cualquier otru tema que nos finca, tamién. Si realmente tenemos informaciones y datos que nos interesen a toos hai que los sacar a la lluz y sopelexalos.

Porque sinón vamos tar apilucando un discursu equí y otru ellí pa nun consiguir iguar dalgo coherente.

Yo tamién sé falar ensin falar y escribir ensin escribir como pue vese guapamente. Y, asina y too, toi seguru qu'hai dalguién qu'entiende lo que quixi... o nun quixi dicir.

viernes, 6 de noviembre de 2009

Resclavos nel tiempu.


Cuando una civilización o una cultura dexa pasu a otra que la sustituye siempre queden nicios y escatafinos d'ella inxertaos na qu'ocupa'l so llugar. Echando una güeyada al pasáu, incluso al más remotu, atopamos buelgues suxerentes nesi aspectu.


Una de les cueves señeres del nuestru arte paleolíticu, El Pozu'l Ramu, ta recorrida per un ríu y tien como una de les sos pintures que más llamen l'atención un conxuntu de vulves femenines. Casualmente nel orixen real o míticu del reinu de los ástures, Cuadonga, alcontramos tamién una cueva, furada polos tabayones d'un ríu y que fore morada d'una diosa.


La presencia máxico relixosa de lo femenín na nuestra alcordanza ye abondosa. Ehí tenemos tamién l'emplegu d'esi amuletu milenariu, la cigua, que ye la representación d'una clica. D'otra miente ta arrecoyíu na nuestra tradición oral el vezu d'enseñar el fañagüetu al diablu pa uxar la so presencia.


Ta constatáu l'usu de les haches neolítiques con una finalidá más allá de la meramente práctica. Ehí tenemos el magníficu exemplar atopáu nel dolmen de la Santa Cruz, a la que se-y da una interpretación d'amuletu, de símbolu de prestixu o poder... Pues tovía anguaño tenemos la piedra'l rayu heredándose de xeneración en xeneración polos descendientes del qu'un día l'atopara. Esa piedra ye un hachu neolíticu. Nuevamente tamos ante otra conexión milentaria col nuestru pasáu remotu. Tornando al dolmen, hasta tiempos bien recientes, los vecinos del entornu garraben tierra del so túmulu por considerar que tenía propiedaes curatives.


Y de la mesma manera qu'ocurre nos casos anteriores, de xuro que si siguiéremos pescudando nel nuestru pasáu, dende los tiempos más alloñaos hasta otros más recientes, podríamos descubrir casos a esgaya onde los resclavos del ayeri rescamplen güei. Vendríanos bien facer una cura d'humildá, tan enchipaos que tamos nos avances tecnolóxicos y na nuestra sociedá superior y afayadiza. Al poco qu'escarabiquemos nel nuestru pasáu, nel nuestru ser, vamos tener que reconocer que tovía conservamos rasgos "primitivos" del formientu identitariu del que procedemos.


miércoles, 4 de noviembre de 2009

Reflexón asturllionesa.


Dientro de la mio enorme sabiduría quiero güei contribuir al alderique que ciertos grupos y persones caltienen a dambos daos del cordal y qu'afita les fondísimes diferencies de toa mena qu'estremen a asturianos y llioneses.

De mano, la manera de puxar na llucha llionesa ye bien distinta de cómo se fai nel valtu asturianu. Asina, mientres el lluchador lliones resopla con un "¡buuufff!", l'asturianu utiliza una manera como más reservada, una especie de "¡mmmñññ!". La diferencia nesti aspectu queda perdemostrada.

Na estaya de la natación los estilos nun coinciden gota. Mientres que los llioneses dominen la modalidá "nadandonríu", los asturianos son meyores na modalidá "braciandonmar". Quede equí tamién clara la diferencia ente unos y otros.

Pero ye nel aspectu racial, el errehacheanu, onde les diferencies son abrumadores. Nun fai falta facer grandes análisis pa estremar a unos y a otros, y los mui intelixentes como yo, estremámoslos sobraos. Pa ello basta con fixase nel color del blanco de los güeyos. D'esta manera, mientres que'l de los llioneses asemeya al color de la llechi de una vaca pinta, el de los asturianos tira muncho más pal color de la llechi de la vaca roxa. Clarísimo y elemental. Nun va tanto estremé yo asina a un llionés a una distancia de doscientos metros. Al final yera un primu míu de Quintueles, pero un error tienlu cualquiera, y nun dexa de ser una escepción que confirma la regla.

Nun quiero acabar ensin encamentar a los mios compatriotes asturianos del peligru que pa ellos tienen les tierres vecines llioneses, debío a los graves problemes d'adaptación a elles al ser dambos pueblos de races mui distintes. Yo mesmu tuvi a puntu perecer hai unos años y si toi equí pa cuntalo ye de milagru:

Resulta que vendíen pal sur del cordal un terrenín qu'en llionés llamaben "bodega", pallabra que desconoz l'idioma asturianu como sabe hasta'l más tontu. Y resulta que la tal "bodega" (¡cómo cuesta pronunciar pallabres de llingües estrañes! ) taba baxo tierra, mirái que son raros per ellí. El casu ye que la vendíen con una collecha entera de vinu de milenta botelles. Pensé yo entós en comprar aquel solar cola mencionada collecha, faceme de pasu per ellí cerca con media docena de xamones y otra media de cecines, y trancáme nesi sitiu durante un fin de selmana pa dar bona cuenta de too ello. Al final díxome'l médicu que nin se m'ocurriera, que nun me diba adaptar a aquél clima y orografía, y que podía hasta espichala. Fíxi-y casu, desistí, y salvé la vida.

En resumíes cuentes, espero qu'estos datos que vos apurro vos sirvan pa decatavos de los munchos males recíprocos que vos puen achisbar tanto a llioneses como a asturianos si aneciáis en cruzar el cordal respectivamente pal norte y pal sur. Que con estes coses nun se xuega y nun vais tener siempre la suerte de que na bloguesfera o notru llugar, dayuri, temos xente tan preparao y culto p' abrivos los güeyos ante lo evidente...

martes, 3 de noviembre de 2009

Yá llegaron los uniformes.


Préstanos practicar el sectarismu más que a un guah.e un carambelu. Pa qué lo vamos negar. Zapicamos nél una y otra vez. Ye'l nuestru antoxu de nacimientu. Y nun tenemos manera de borralu.

La dixebra en montoneres de tribus ye la mayor demostración d'ello. Llevamos décades de tribalismu. Que nel nuestru casu ye sinónimu de sectarismu. Hai tantes tribus y subtribus que a min resúltame imposible dafechu facer una datación de toes. Amás si lo intentare sedría imposible. El formientu tribal fai qu'en cualquier momentu naza una tribu nueva non datada esbarrumbándote l'esfuerzu anterior.

La cuetión ye peliaguda y hasta güei nun tuvo igua posible. Pero de güei n'adelantre toi seguru que tampoco. Equí ye imposible construir más de lo construío y coles blimes qu'hai nun hai paxu posible que texer a parte de los yá acabaos.(...)

(...)El casu ye qu'esta manera d'entamar va d'empixe y nun ye en si mesma l'oxetu d'esta entrada, sinón que ye una antoxana pa lo siguiente: Resulta que cuestiones d'esta mena y otres munches de les que tengo escrito bien de veces entamen a resultame peligrosamente estrañes. Vamos, que de pasar d' esmoleceme y llevame a la reflexón y a la crítica, entamo a recíbiles con un simple encoyimientu de costazos como aquél que diz "y a min qué". La indiferencia y l'escepticismu tan entainando a ganar nel mio pensamientu faces estenses enforma. Y, pa detrás, ye que prácticamente nin me preocupa, oi.

Yo nun sé si se deberá a la mio condición de xanu, pero dende hai unos quince díes p'acá toi careciendo d'una especie de metamorfosis. Vamos, que camudo. No que más lo noto ye en que coses qu'apocayá m'afalaben abondo agora resúltenme cásique ayenes y distantes. Traducío al llinguaxe blogueru, si fixere un repasu críticu a lo que llevo publicao hasta agora, igual borraba l'ochenta por cientu de too ello. De fechu, llegué a plantegame borrar el blogue y dempués too quedó nuna simple matuxa de la qu'aliqué faciendo un cambiu na cabecera de la bitácora...

Asina que mosqueáu y pa pidir conseyu aconceyé ayeri colos mios amigos de siempre, Sidru'l Guirriu, Don Quxote de Caravia, El Trasgu Manfurada... y demás, y tranquilizáronme bastante, la verdá. Según ellos toi altravesando un procesu de "fartura mental y enfastiu xeneral". Vendría a ser que cuando ún lleva cuantayá criticando les mesmes coses y comprobando que siempre siguen igual o peor, el celebru acaba diciendo "basta" y remontándose. Y, tamién según ellos, esto cúrase solo col pasu'l tiempu, como los chorizos afumando adulces, vaya.

Tamién ye cuestión cierta qu'esto del mundu virtual ta mui bien y tal, pero ehí fuera les coses rulen de manera bien diferente. Paru, corrupteles, insolidaridá, indiferencia, especulaciones, trabayos ruinos, derechos a la baxa, intereses de toa mena... una realidá a la que bien de veces (n'ocasiones, con increible insistencia) negámonos a mirar entientes y preferimos (yo'l primeru) sustituila por planteamientos deliciosa y absurdamente surrealistes y hasta infantiles.

Total qu'habrá que siguir tecleando, magar seya como terapia pa echar fuera adrenalina y gafeces, que tampoco ye una melecina despreciable, y como la lluz, la llinia ADSL, y les malicaes del ordenador (la última'l puñefleru router que s'esgonció) págoles yo, tampoco naide me pue refregar pel focicu que toi nesto pa catar la corexa del asturianín contribuyente... que yá ye dalgo, cóime.

Y tratar de mentalizame pa mirar les coses d'otra miente, esforzándome n' adeprender a convivir con tola recatafila de sectes llariegues. A mirales con otros güeyos, como a les estatues del parque, cola curiosidá del paseante, y a les más paxareres, hasta con simpatía, que'l colloríu siempre dixeron que ye síntoma d'allegría, recóime. Y, de pasu, a tirar p'alantre per onde al rixu-y pete y p'hacia onde les ganes empobinen.

Por cierto, díxome un paxarín, que yá llegaron los últimos uniformes... Entainái que los que quedéis fuera vais tener qu'entamar otra secta con vestimenta diferente y eso lleva xera y perres... (Pero ¿qué rediós toi diciendo...?. ¡H.oder que debo tar grillando ...!. ¡Socorroooo!).

domingo, 1 de noviembre de 2009

¿Por qué me quies?: Pol interés.


La historia d'una parte nada despreciable del nacionalismu/asturianismu descríbese como una espera poles perres, el puestu, o l'enchufe necesariu pa dar un reblagu na vida.

Encamienta un dichu tan políticamente correctu como prudente que se diz el pecáu pero non al pecador.

Faciendo remembranza de los últimos trenta años que, en númberos redondos, son los que tienen de vida'l nacionalismu/asturianismu actuales podemos atropar abondos nomes y colectivos de toa mena que, partiendo de posiciones opuestes al poder represor colo asturiano, acabaron, d'una manera o otra, colaborando con él.

Lo curioso ye qu'esto ta tan enraizao ente nostoros que si dalguién lo critica darréu surden los que retruquen presuponiendo que'l criticador acoxa de la mesma zuna que los criticaos. Ye lo que nos encamienta'l refrán: "piensa'l lladrón que toos son de la so mesma condición".

El casu ye que salir corriendo tres l'anzuelu del poder dende posicionamientos llingüísticos, culturales, y políticos nacionalistes/asturianistes, nun primer momentu opuestos y radicales al mesmu, ta convirtiéndose nun llugar común d'alcuentru pa cada vegada más xente.

Y les consecuencies d'ello son clares. El personal nun ye bobu dafechu y estes coses veles. Asina que cuando dende posiciones nacionalistes/asturianistes nos diriximos a ellos plantegándo-yos alternatives a lo que refuguen, cada vez-yos cuesta más trabayu aguantar la risa.

viernes, 30 de octubre de 2009

Voces en castañéu.

Un casañéu ta bien pa dir a la gueta. Pa enllenar una cuerria con castañes. Pa curiar les castañales. Pa pasear simplemente. O p'abellugase en dalgún vieyu caborniu los xanos, diaños o trasgos. Pa eses coses paezme un sitiu afayadizu.

Lo que yá nun me gusta un res ye dar voces en castañéu. Porque nunca nun les escucha naide y tolo más valen pa oxar a dalguna pega o pa espantar a dalgún raposu que t'acusbia amatagáu.

Los asturianos conscientes de les llaceries que cuten al nuestru país tal paez que damos voces en castañéu. Nun castañéu n'abertal y ensin curiar. Onde malpenes s'atopa daqué pa demer. Y coles muries de les cuerries esbarrumbándose ente'l felechu.

martes, 27 de octubre de 2009

Come-yos l'alma.


Nun soi nada partidariu d'andar tol día falando de fútbol y yá lo critiqué dacuando nesti blog. Pero güei voi yo menteme nesi barrizal. Y ello pola mor de qu'hai coses que llevo tan mal que si nun les asoleyo reviento.

Una de les coses futboleres que siempre me fadiaron ye la de toa esa xente que, siendo asturianos, pasen el día naguando, sofitando y festexando los triunfos d'equipos de fuera'l país. Pero, pa detrás, nun paren ehí, y nun sólo se dediquen a molestanos a los demás pegando berríes, faciendo esparabanes y hasta tirando voladores colos triunfos d'eses escuadres poderoses y foriates, sinón que cuando s'enfrenten a equipos asturianos hailos que tamién quieren que-yos zurren la badana. Y eso, collacios, nun lo llevo de nenguna de les maneres. Ye que me pongo malu, de verdá.

Asina qu'esti sábadu pasáu cuando'l millonariu equipu de D. Florentino col so potencial galácticu llegaba a pasar como una machucona penriba'l Sporting andaba yo, magar seya poco futboleru, con bastante mal humor por sentir ayuri comentarios despectivos de los merengue-babayos y hasta apuestes de cuántos goles-yos diben cayer a los del Molinón. Pa detrás, tengo tal puntería que salí a tomar daqué xusto cuando taben en tolos llaos colos güeyos clavaos nos televisores que cásique te daba apuru dirixite al camareru...

Pero la xornada taba pa la mano y pasaben los minutos y los xixoneses aguantáben-y a aquel equipón, de rebote la xermandía vocinglona foriata callaben como afogaos, y al final dábase un empate ante la incredulidá de munchos, la alegría de bastantes y el disgustu de los amantes de tirar piedres contra'l teyáu futbolísticu propiu. Como xanu que soi, y polo tanto rarón a embute, a min esnalóme la mente dos mil años atrás, onde unes llexones romano-capitalines viérense tornaes pola resistencia norteña parapetada tres los montes Molinonius. Pura épica. Un equipu asturianu con un entrenador cántabru y un guardameta llionés subiéndose a les barbes de la másima representación del imperiu futboleru, lo que demuestra que les vieyes aliances tribales inda funcionen.

Dempués los más chaqueteros diben de perdonavides y buscaben de pasu xides: "Bueno, como empatemos col Sporting nun me sabe tan mal...". A lo que retrucaba yo pensando en playu: "Yá t'oyí, navaya".

El domingu en teletini daben un reportaxe con un paisanu al qu'invitaren a ver el partíu. Ellí taba cola so gorruca y una bufanda roxiblanca al pescuezu. Cuando diba a entamar l'alcuentru, esclamó dalgo tan asturiano como contundente que diba tiempu que yo nun sintiera:

-¡A come-yos l'alma!.-

Esacto. Y añado yo que a tolos niveles. Come-yos l'alma.A tantu antiasturianu. A tantu desertor del aráu y de la patria. A tantu enemigu de los nuestros equipos deportivos, del nuestru clima, de la nuestra llingua, de la nuestra cultura, en definitiva, a tantu belixerante pa con tolo propio d'Asturies. Hai que come-yos l'alma, mete-yos como pa fregar, da-yos como panzorru, facese una semeya con ellos na boca...

domingo, 25 de octubre de 2009

¿Fala usté horteriense?.


Dende que tengo usu de razón conozo la sidra. Y dende que tuvi edá pa bebelo écholo pal butiellu dempués de tastialo.

Tola vida sentí frases como "¿vamos tomar unes botellines?", "¿vamos tomar una/unes de sidra?", "¿tomamos unos culinos?", etc. Pero siempre sentí a la xente utilizar el términu sidra en singular.

Pero dende hai unos años p'acá, cola introducción de la xíriga horteriense na nuesta cultura, siento coses como "¿tomamos unas sidras?", "¿nos pones unas sidras?" y frases pol estilu d'inventu bien recién nos ámbitos pih.os-castellanistes.

Y como nesti país nuestru tolo malo se pega, pues a los medios de comunicación y a les instancies politiques faltó-yos tiempu p'adherise al inventu. Y cola so potenciación a tolos nieveles, anguaño esta manera foriata y horteroide de referise a esta bebida tradicional de nuestro ta ganándo-y tarrén a les referencies de tola vida.

Hasta tal puntu que cuando un falante tradicional pide sidra, en ciertos ambientes, como siempre se pidió, col singular de la pallabra, yá hasta lu miren raro y como diciendo "¿de qué lejano monte bajó este?".

Asina que a la nuestra llingua ta saliéndo-y un nuevu llinguaxe competidor. Y nun me toi refiriendo a la llingua castellana, sinón al horteriense, un falaxe mui chupi-guai y molón.

Lo que nun pase nesti país...

viernes, 23 de octubre de 2009

Dicir que non.


L'atracción pola fama, la sonadía y les prebendes ye descomanada. Ye casi un imposible atopar dalguién qu'ante la llamada de lo rellumante respuenda con un "non".

Xente que critica la concesión de tal o cual premiu nel mundu del cine, la lliteratura, o cualquier otra actividá pierde les madreñes corriendo a garrar esos galardones si l' agraciáu ye él.

La incoherencia ta allugada en tolos requexos de la nuestra sociedá. Predicamos una cosa y facemos otra. Cuando la posibilidá de ser reconocíos pica a la nuestra puerta escaecemos llueu les nuestres rocees y crítiques gafes pa echanos en brazos del reconocimientu públicu.

Cuando los discursos críticos se centren na refuga del dineru y la bayura la situación ye esperpéntica. Los más encerriscaos defensores de los probes cambien de chaqueta y cuerren a poner la mano cuando sienten ruxir les monedes ayuri o les posibilidaes d'esguilar socialmente.

Vivimos nuna sociedá que funciona asina nuna proporción abrumadora de los casos. Y toos zapicamos neses piedres llegada la ocasión, que nun se trata equí de tirar la piedra y esconder la mano.

Y la nuestra sociedá asturiana nun diba ser menos. Los grandes posicionamientos éticos acaben esbarrumbaos como un castiellu naipes en cuanto'l poder chisga'l güeyu. Nos casos más miserables, véndese too y a toos por unes auténtiques migayes.

Dicir que non por ética y coherencia ye una frase qu'usamos nel nuestru discursu cotidianu, pero cuando somos nosotros los destinatarios de los beneficios de diversa mena la cuestión cambia sustancialmente. Y perhí ye per onde podemos alcontrar la esplicación a tanta deserción que lleva del compromisu alturista al beneficiu palpuñable.

lunes, 19 de octubre de 2009

Ciudadanos o vasallos.


Dientro d'unos díes van tornar Mingo y Colasa a ver cómo ta la casería. Si les sebes tán fradaes, la llosa cuchada y l'horru bien sofitáu.

Con esti motivu va entamase fiesta na quintana. Y los bufones reblincones yá prueben una y otra vegada los sos paxellos de fiesta y ensayen ensin descansu les sos más bixorderes moxigangues delantre l'espeyu.

Vamos asistir a una espantayada onde'l conceptu de ciudadanu va ser sustituyíu pol de la pleitesía del vasallu, y fundamentalmente más pola voluntá, a costa fecha, de los bufones reblincones y una parte mui importante de la población qu'aplaude tal comportamientu, que poles esixencies de los caseros. Les coses como son.

Pero esto en sí mesmo nun ye lo peor. Porque lo único que muestra ye la punta d'un iceberg qu'escuende la so parte más bultable sol agua. La cuestión bramente grave ye que nesti Estáu y nesta Asturies el conceptu de ciudadanu llibre y con derechos ta viéndose acorripiáu y tarazáu tolos díes. Porque'l ciudadanu cada día ta viéndose obligáu a camudar el so estatus pol d'un vasallu que sive pleitesía a una clas política y unos grupos arreyaos al poder qu'avancen con pasu fitu hacia una xudicialización de les llibertaes ciudadanes acompañada por una reconversión del Estáu Democráticu de Derechu nun réximen policial y clientelar onde'l que gorguta acaba con serios problemes.

Y de lo escrito nel párrafu anterior tenemos exemplos asgaya ensin falta de salir del nuestru país asturianu. Camiento qu'ehí ta'l megollu fundamental y pergrave de la cuestión. Mui penriba de les xirigoncies de los bufones reblincones y de les folixes fates qu'alrodiu de visites de ringorrangu entretengan por unos díes a una bona parte de los nuestros conciudadanos.
............................................................................................................
PD.: Estos díes saltó la noticia de la intención de convertir el puertu d'El Musel nun basureru a nivel inernacional. De confirmase la propuesta les nuestres costes y la nuestra ecoloxía puen sufrir un dañu considerable. Nun pintamos nada. Somos una islla d'amomiaos nel norte español. Y cuando los que remanen los filos de la política y la economía alcuentren un sitiu llaráu de vasallos mánden-yos p'allá lo que naide quier.

Ye lo que nos tienen programao a nosotros. Convertir el cacarexáu "paraísu natural" nun basureru descomanáu.

Y mientres pasa esto, el personal a figos y col pasu cambiáu. Como siempre. Un dolor.

lunes, 28 de septiembre de 2009

Prueba de Valor.

El barganaz onde se diba celebrar el gran combate taba atarraquitáu de xente arrodiando'l so perímetru. La Prueba de Valor que diba decidir si'l gran xefe Pamestona tornaría a ganar l'honor de dirixir la tribu de los feseanios dos años más taba a puntu d'entamar.

D'un requexu salió l'osu Yogui desafiante y gafu caminando siempre a dos pates. La tribu acorviólu ya insultólu tolo que quixo y más. Empobinó pal centru del recintu y quedó a la espera de que saliere'l so enemigu.

Ente una mar de glayíos, aplausos, iñíos, dees francíes por espatuxos y bazos fendíos por coldos eufóricos, salió'l gran xefe Pamestona, col so taparrabos con una rosa collorada bordada primorosamente al altor de los perendengues, faciendo esparabanes y enseñando dos bolones nos sos trabayaos brazos.

El gran xefe ya l' osu miráronse desafiantes y engarráronse con puxu. Una bofetada ensin contemplaciones dexó la zarpa Yogui marcada na cara Pamestona. Pero lloñe d'acuruxase, el bravu cabezaleru solmenó-y un rodiyazu na coyonera a la fiera que-y fixo pegar una berrida al empar que soltaba un resoplíu propiu d'una ballena de gran tonelaxe. De sutrucu, Pamestona esparrancó les piernes y garrando al osu con una mano de la pechera y pasándo-y la otra pela entepierna hata garra-y la culera llevantólu en pelondines y zampólu en suelu ente un gran estruendu de güesos francíos quedando inmóvil dafechu.

La tribu celebraba enfotada y entusiasmada'l resultáu del combate. El gran xefe ganárase a los güeyos de tola castra feseania'l derechu de dirixir los sos destinos un par d'años más, que traducío a llunes yera una burrada d'elles. Y allá, rinchando, acercábase'l carru apináu de pinchos de tortiella, tiráu por dos gües que casi nun yeren a movelu de lo que pesaba por más que los afalaben, pa festexar la xornada.

Pela nueche na so tienda, el gran xefe Pamestona miraba con cara circunstancies pal gran fechiceru Carafigu que, encanáu dafechu pa iguar les sos milenta frayadures, rancía tiráu en suelu como un fardu. Trataba de gorgutar daqué ya'l gran xefe cozcóse hasta elli y púnxo-y la oreya raspiándo-y la boca pa sintilu. Un filín de voz salió entós del gargüelu del gran fechiceru Carafigu:

--Anque me mates polo que te voi dicir, gran xefe Pamestona, pa la prósima Prueba de Valor ¡va marutase d'osu Yogui to puta madre!.--

jueves, 24 de septiembre de 2009

Xermandía de non agresión. ¿Acuéi?.

Toos persabemos les tirries ancestrales que nos profesamos los que tamos d'esta mano del sucu que separta los que quieren un futuru pa esta nación de los que la quieren camudar nuna fastera atlántica col futuru peslláu.

Nesi aperrillanos de contino practicamos xeres abondes. Dende sopelexar bilordios dayuri, pasando por escurrir toa mena de llevantos y acabando pol insultu llisu y llanu. Poner exemplos ye fato y pérdida de tiempu, asina que voi aforrame amesoriar dellos.

Y, magar pueda suponer dar voces en castañéu otra vegada más, quiciabes seya'l momentu de parar d'una vez y enfotanos en mirar caún los trapos puercos que tenemos en casa p'abogadalos, envede rebuscar nes cases ayenes los de so p'asoleyalos perende.

Podíamos entamar guapamente por axeitar una "xermandía de non agresión", esbrexando por enterrar vieyes zunes y poniendo tol remangu por zarrar feríes engafentaes cuantayá. Camiento que toos díbamos salir ganando col cambiu.

Pensái qué prestoso tien de ser pasar per delantre la casa d'esi vecín que siempre isaba'l perru pa contra ti y comprobar que yá nun lo fai y, pa detrás, hasta cuando ta pa la mano, pue da-y por apurrite un canxilonáu d'agua pa que mates el secañu.

El casu ye qu'últimamente arruxida enforma tol tema de los alcuerdos de mínimos, xuntances y demás. Pero almeyor fai falta una premisa previa. Entamala con una xermandía, un pactu non esplícitu, de non agresión. Camudar darréu y dafechu los comportamientos y discursos belixerantes y enterrar definitivamente les gafures, obleros, mexacanes y tentaciones de toa mena pola apurridiella, palu nuna mano y chaqueta na otra, recordando'l final de les vieyes romeríes.

El camín pa entendenos toos ta ehí delantre esperando pola sestaferia. La verdá ye qu'andamos endagora en pañales. A ver si puxamos pa iguar esa xermandía a la que me refiero y entamamos a facer galantes. Dempués a caminar. Y hasta pue que dalgún día hasta a entainar y too.

martes, 22 de septiembre de 2009

Xente de casa.

Ye corriente ente nosotros nun-yos facer munchu casu a la xente de casa. Nin a nivel de los medios que namás que ven lo que relluz pa los madriles, nin bien de veces pa los más llariegos.


Esta vegada sí, nalando pela rede (Infoasturies) podemos echar una güeyadina a un historial deportivu d'esos qu'hai que ver sentaos pa nun amoriar. Ye l'historial de Manolo Busto, piragüista qu'acaba d'algamar la so décima medalla d'oru nesti deporte nel últimu campeonatu del mundu de maratón celebráu en Portugal. Y como nun ye oru tolo que relluz, si-y sumáis les consiguíes notros metales, el palmarés asusta.


Pa detrás la so historia deportiva nos últimos tiempos tien el so aquello. La federación española de piragüismu nun lu traga. Quier xubilalu y pone-y toles torgues posibles pa que nun pueda compitir. L'añu pasáu consiguiéronlo, pero esti nun tuvieron otru remediu qu'apechugar con él y ehí ta'l nuevu campeonatu. Qu'una federación quiera apostalgar y retirar a un campeón d'esti nivel ye como pa resfregar los güeyos d'incredulidá.


Tamos ante'l mayor campeón del deporte asturianu de tolos tiempos y ún de los mayores campeones a nivel mundial. Pero ehí ta medio arrequexada la so trayectoria. Desconocida dafechu pa munchísimos conciudadanos asturianos. Ensin casi ser p'acutar un sitiu nos medios d'indormación nin pacullá nel estáu nin paciacá en casa. Y pensar que pueda sonar pa esos premios que se dan toles serondes nel Campoamor d'Uviéu y que prefiero nun mencionar pa nun me poner de mal humor ye perder el tiempu. El provincianismu y papanatismu polo ayeno paga'l so peaxe.


Y la verdá, viendo cómo tan les coses, cuando la xente de casa llogra daqué importante y que fai que sonemos por dalgo más que por llaceries o caxigalines, nun me cai embaxo. Como ye esti casu. Un piragüista que nel estáu vecín allugonos nel mapa. Y anque esto se dea mui de xemes en cuando, presta.

jueves, 17 de septiembre de 2009

Xuntanza. Primeres reflexones.


Va pocos meses desque s'entamare na rede un movimientu favoratible a la xuntanza nacionalista/asturianista. Magar permediaren d'entós p'acá los meses del branu cola so desbandada vacacional, el ruxerrux medró y espardióse. Hebo tamién novedaes apocayá y nun ta de más que caún reflexone sobre lo andao.


Empecipiando pol capítulu de torgues destaquen les que yá imaxinaba. D'un llau la que surde del encerriscamientu d'una parte de los cabezaleros políticos en convertise ellos y les sos formaciones nel "referente". Dalgo que nunca nun va pasar y que la realidá, sobremanera electoral, ta encargándose de retrucar una y otra vegada. Por más que fadie y disguste a dellos, equí nun hai un referente. O si se quier dar la vuelta a la tortiella, toos son referentes, ellos y los que consideren los sos enemigos políticos nos ámbitos nacionalistes/asturianistes.


Hai qu'apechugar tamién con un sector formáu por xente que s'afaya como en cá güelu no marxinal. Ye constatable nel naconalismu/asturianismu la esistencia de grupos con un mieu escénicu descomanáu. Amorien coles altures polítiques y si ellí onde s'alluguen entama a xorrecer, éntra-yos un pruyiciu que nun son a aguantar por dixebrase y montar la so xermandía casera. Esta actitú pue restrexase a lo llargo de la historia de les formaciones polítiques asturianes.


En cierta manera xuncíu al anterior, tamién hai militantes o simpatizantes políticos que consideren un trabayu perimportante puñar contra tolo que se ximielga nos ámbitos nacionalistes/asturianistes. Lo que nun ta con ellos ta escontra d'ellos. Semen equí y acullá, llevantos, bilordios, acusaciones de toa mena. Revuelven na puxarra col envís d'atopar aquél fallu del so "enemigu" y asoleyalu aína. Una simple güeyada a la rede apúrrenos casos d'estos a magüeyu. Una de les sos espresiónes más gafes alcontrámosles cuando nos atopamos na antoxana de dalguna fecha importante que pue dir dende una convocatoria electoral a celebraciones como la del 8 de Setiembre. Neses ocasiones sal, de sutrucu, la noticia que truña contra l'otru, l'alderique que xorrasca les áscuares asollando'l fueu del enfrentamientu que paecía anubríu. Tamién esto ye constatable agüeyando dayuri.


Hai un tema que resquema y ye motivu de qu'espoxiguen les discusiones darréu, pero por ello nun se pue resalvar pa dexar de llau. El perconocíu contenciosu xudicial poles sigles AA. Equí hai que filar fino y falar claro. Tamos ante un finxu fundamental, ante una exa clave sobre la que xiren les mayores zunes del nacionalismu d'izquierda anguaño. Nun ye xera de mio permediar nel contenciosu. Nin dar nin quitar razones a naide. Eso tengo que lo dexar claro, nidio y rellumante. Pero como nacionalista favoratible a la xuntanza tengo de reconocer y manifestar, porque camiento que ye compartío por abonda xente más, qu'esti tema xudicial ye anguaño un sucu perimportante que torga l'apautamientu del nacionalismu d'izquierda. Eso ye asina y nun lo podemos negar. Rescampla. Y si se quier tien igua. Porque los xulgaos tán atarraquitaos de milenta temes más graves qu'esi y tienen arreglu. Y nun digo más nada.


Pero too nun son tenebreros nel procesu hacia la xuntanza. Hai tamién pasos que, garraos con tola prudencia y xacíu que requieren, apunten nun sen más afayadizu pa toos. D'un llau, l'allugamientu alrodiu del llema "SOS Asturies" d'un bon garrapiellu de fuerces polítiques, sindicales y ciudadanes. D'otru, la robla d'un alcuerdu ente AA (una de les partes, pa que naide nun se remonte nin moleste) ya'l PAS. Dalgo que franció lo que se suponía que yera'l procesu llóxicu: xuntanza del nacionalismu d'izquierda pa dempués buscar l'acercamientu al asturianismu interclasista. Y ye precisamente esto cabero lo que me fai aportar a la última reflexón.


Pragmatismu, xenerosidá, dexar nel estoyu principios irrenunciables. Efectivamente, p'algamar una xuntanza pola que tamos arranando una parte, con tola modestia y tamién con tol convencimientu, mayoritaria de los nacionalistes y asturianistes hai que siguir dos fitos básicos que nos encamienta'l nuestru saber popular. El primeru, nun poner el carru delantre los gües, plantegando enriba la mesa de debate principios utópicos irrenunciables. El segundu, que'l gatu con guantes nun caza. Si'l procesu entaína al revés de lo que se pensaba y primero hai qu'encontar nel fortalecimientu d'un pactu ente asturianistes y parte de la izquierda nacionalista pa tender una ponte que valga pa que nun segundu momentu se sume a él la parte restante d'esi nacionalismu pues bienveníu seya.


P'acabar, el filandón de la xuntanza ta abiertu y nun paez que lo fixere de baldre. Namás qu'hai que recordar qu'equí naide ye más llistu que naide, nin más importante, nin imprescindible. Caún pue tener una aportación tan importante como la de cualquier otru al mesmu. Y ente toos podemos consiguir dir avanzando si nos enfotamos nello. Falaba enantes del envizcamientu por ser "referente". Pues si en dalgún momentu consiguimos iguar un "referente únicu y compartíu pola mayoría de los nacionalistes/asturianistes" de xuro que les coses van camudar pa bien d'una manera clara y radical.




martes, 15 de septiembre de 2009

Vieyos, veceros, y desorganizaos.


La población asturiana avieya cada vuelta más. Nun se remocica y estos díes d'atras aprucíen nos medios de comunicación datos aparrantes de la desproporción ente la xente más vieyo y la más mozo. Somos abenayá una de les poblaciones más allancaes d'Europa.


Arriendes de les torgues qu'esto acarreta en bien de faces, tamién tien una plasmación de mena política y electoral. Una pírámide de población asina empobina hacia l'inmovilismu tanto a la hora de sofitar alternatives sociales nueves a les esistentes como a la hora d'espeyar resultaos electorales. En resultancia repítese eso tán encamentao dayuri de "siempre más de lo mesmo".


Si tuviere qu'apostar anguaño por qué cantidá de la población podría sofitar dalgún proyectu políticu arreyáu al nacionalismu/asturianismu abúltame qu'andaría alrodiu d'ente venti y trenta mil persones. Nun ye un balagar, miániques, pero tampoco cantidá despreciable. Traducío n'escaños nunes elecciones aseguraríen presencia na Xunta Xeneral, magar non gobernar na mesma.


El problema ye que lo dicho nel párrafu anterior tendría acutáu un sitiu na nuestra sociedá nes condiciones más favoratibles. Y ye agora cuando nos podemos entrugar: ¿Tamos güei delantre d'eses condiciones?. Y la rempuesta podríamos dala nun perfectu tonu coral: non. Porque falamos de condiciones ideales y nel casu de que too se fixere d'una manera axeitada y afechiscada dafechu.


Pero la realidá muéstranos un panorama muncho más solombriegu. El sitiu afayadizu pa ilusionar y mover a toa esa xente ta por andechar. Los proyectos que se presenten anden perlloñe de capiar a aquél que-y prestaría engabitar n'estayes netamente asturianes. Nun fai falta estruyar el cerebru sacando conclusiones nin perdese en grandes rebilicoques mentales. Basta y sobra con sentir lo qu'opina esa xente o con lleer lo qu'escribe. Dende cuantayá quieren "un referente únicu" como finxu qu'oriente nel trabayu ya'l votu. Y tamién dende cuantayá refúguen los "garrapiellos de referentes" que lleven a la confusión y, lo peor de too, a la desmoralización descomanada y qu'avanza col pasu de los años.


Pa detrás el sector que debiere xugar un papel más dinámicu en tol procesu, la mocedá, alcuéntrase escabarriada. Unos pilen pal desdexamientu activista y pa la abstención electoral. Otros siguen la buelga abierta pol pa o'l güelu y participen de la derecha estatal o de la izquierda plural estatal tamién. Pocos s'alluguen nel nacionalismu/asturianismu. Y bastantes de los que tán dispuestos a trabayar atópense enguedeyaos na doctrina de la "guerra permanente" yá endémica nesti tipu de formaciones.


D'esta miente, el panorama que podemos nortiar ye apolmonante. Nun s'atopa per onde s'esmucir d'una situación que ye como'l cuentu de la bona pipa. Nunca acaba y vuelve siempre a entamar. O si lo miramos al vies, sí s'atopó y atopa per onde salir de la llamarga: sentándose a negociar, falando, enterrando l'hachu guerra y enfotándose nel alcuerdu y la xuntanza.


Y asina ta la situacion actualmente. Gobernando esi réximen clientelar que nun pierde veceros por mal que lo faiga, sinón que los gana. Un réximen onde gobiernu y oposición representen la comedia de les desavenencies y, darréu, participen de la pitanza y les prebendes. Y como oposición al mesmu, una xente tresmanao, que nun ve la hora de sestaferiar nun camín claru y común, cola moral embaxo, y col convencimientu que-yos da la testonería de los fechos de que nun hai nada que facer.


Y asina alborez y atapez nesti vieyu país. Ente vieyos movíos pola rutina, agradecíos al réximen de toa frasca, y descontentos desorganizaos de contino. Asina alborez y atapez dende años, dende décades... dende siempre.


Y, por enésima vez, convién repitir que'l tren de la historia nun pasa constantemente. Xugar a nun lu garrar ye enredar con una ruleta rusa de consecuencies imprevisibles.


sábado, 12 de septiembre de 2009

L'asignatura pendiente.


Cualquiera que me visite sabre de sobra a estes altures lo cafiante y repunantucu que me pongo con dalgunes coses. Repítome como la morciella y si fixere un actu de resumen igual con un 10% de les entraes del blogue diba sobráu pa dicir lo que quiero.


Güei voi cabruñar otra vuelta con más de lo mesmo y encamentáme a min mesmu de variar un pocoñín, que llevo una trayectoria que...


Total, que voi escribir de la que considero l'asignatura pendiente de nuetro: la historia. Como antoxana, diré que si tuviere que reducir al másimo los pegollos identitarios d'una nación quedaríame con los dos que m'abulta que más rescamplen: la llingua y la historia, que vienen a ser dos de les principaes erbíes qu'esa nación tien pa reconocese a si mesma y ver el mundu.


Nel casu de la llingua y afortunadamente parezme que lo tenemos bastante claro. Facemos piñu a la hora de considerar l'asturianu fnxu cimeru de la nuestra identidá y darréu demandamos pal mesmu la consideración cimera que se tien pa cualquier llingua d'un país: la oficialidá y l'emplegu normal y davezu en cualquier sitiu, circunstancia y ocasión.


Onde camiento qu'acoxamos más ye na historia. D'un llau, porque la desconcemos enforma. D'otru llau, porque lo poco qu'aportó a nosotros foi tracamundiao pa xustificar identidaes ayenes. P'acabar, porque nos enfotemos na recuperación de la llingua dexando munches vegaes n'abertal y echando meruxa la faza histórica.


Cuando a un pueblu como ye'l nuestru casu-y arrampuñen la so historia, o polo menos fitos imprtantes d'ella, puen adoptase dos postures. Dexalo tar y tratar d'escaecelo o encerriscase en recuperar lo perdío.


Nel primer casu, contrariamente a la intención de los partidarios de l'amnesia, lo que sucede ye qu'esa historia acaba siendo utilizada polos lladrones pa frayar sistemáticamente cualquier intentu de que guañe nesi pais una conciencia identitaria. Nel casu asturianu rescampla esto de tal manera que nun me paez que faiga falta poner exemplos acabante pasar el 8 Setiembre endolcáu nes connotaciones del "bierzu de..." que toos conocemos de sobra.


Nel segundu casu y de llograr l'oxetivu ábrese una posibilidá descomanada d'afondar y empobinar pel camín identitariu. Con agüeyar pa otros países colos que compartimos estáu debiere ser bastante pa pescanciar esto. Tamién con comprobar l'enfotu enfermizu de los que nos gobiernen por tapecer cualquier rellumu históricu que contribuyere a que guañe ente nosotros el conocimientu históricu propiu, cualquier rispiu qu'aumentare'l probe badaxe de la nuestra alcordanza histórica, debiere ser tamién bastante p'atalantalo.


Pienso entós que dibiéremos trabayar más nesta estaya de la nuestra identidá colectiva. Desaniciar dafechu los mieos y prexuicios que dacuando nos afalen pola mor de les interpretaciones y xustificaciones ayenes a nosotros que de períodos de la nuestra historia se vienen faciendo dende cuantayá. Encamentanos tamién que cualquier períodu históricu nuestru pue ser arrampuñáu y utilizáu contra la nuestra alcordanza histórica, somantu básicu de la nuestra identidá.


Hai coses que nun me caen en baxo. Si siguimos al pie de la lletra les informaciones que los lladrones históricos arreyaos al poder nos apurren, la historia del nuestru territoriu dixebraríase en dos grandes etapes: la primera, enantes de Cuadonga onde too sedría romano, y la segunda dempués d'esa dómina onde too sedría español. Y entós entrugo: ¿Ú Asturies?. La negación cimera, l'absurdu empicorotiáu a la categoría de conocimientu rescampla dafechu.


Y al final, les consecuencies de too ello tamos pagándoles anguaño. Por dos factores que caminen xuncíos: los intereses foriatos esfronaos colos nuestros, y los nuestros propios prexuicios y desdexamietu. Nel primer casu poco podemos facer, van siguir ehí combatiendo la nuestra identidá histórica. Remanándola y ocultándola. Pero nel segundu namás que nosotros tenemos la pallabra y la decisión fita de d'amechar na xera o de dexalo too pa monte...

jueves, 10 de septiembre de 2009

Castiellu Gauzón: ¿cruzamos los deos?.


Doi una revolada pela rede y alcuentro nel diariu dixital Aruelu anuncia de les escavaciones que se tan faciendo nel Castiellu de Gauzón. Cuando llego a onde se fala de les dataciones siento rebusquinos en butiellu. Ye nun sieglu anterior a la Batalla Cuadonga. Malo.


Les escavaciones de La Carisa asoleyaron unes fortificaciones que tamién yeren anteriores o cercanes a la dómina de la citada batalla. Tamién consideraben los arqueólogos que podíen tar enriba d'otres ástures. Hasta la xente folixera entamó una moxiganga anual de llucha ente astures y romanos.


Rescamplaba de cualquier manera que se quixere güeyar aquello que n'Asturies había una sociedá abondo más organizada que la que se suponía n'antoxana de la mítica batalla. De sópitu, dende'l Gobiernu Asturianu paralicen les escavaciones que se llevaben faciendo dende años atrás. Nun ye casualidá nenguna, nin falta presupuestos nin nada. Ye una decisión tomada a costa fecha. Ta claro.


Pues lo qu'asoleyen les escavaciones nel Peñón de Raíces son más de lo mesmo. N'Asturies había na sociedá organizada y con guaños de feudalismu enantes de lo que se pensaba. Y eso lleva a la conclusión de que la xente d'aquelles dómines tenía una conciencia muncho más espolletada de pertenecer a un territoriu del que se pensaba tamién.


Poro, ando yo roceanu. Dicen que les escavaciones de Gauzón van prolongase hasta'l mes de payares. Espero que seya asina. Y que pal añu qu'entra entamen otra vuelta con elles pa que rescample tolo que ta tapecío nel tarrén y tres la borrina de la historia. Y espero y deseo que nun venga la orden tarrecida de "Esto se ha acabado. No interesa seguir con estas historias" dende'l Gobiernu del Señor Areces col beneplácitu de la Izquierda Plural.


Y ye que cuando ún siente esi discursu paranoide y enfermizu dafechu que renuncia a llamar al nuestru país coses tan simples ya inofensives como "Asturias" o "Provincia de Asturias" o "Región Asturiana", como ellos mesmos lo veníen faciendo hasta agora, porque al podriellu qu'esa xente tien por cerebru abúlten-yos subversives camudando la denomiación por "Comunidad Autónoma" pue esparar yá de too, hasta que a la propia Virxen de Cuadonga la denominen "Elemento religioso patronal de la Comunidad Autónoma consituida en una franja territorial norteña española". Como pa permitir escavaciones que puedan estimular una peligrosísima conciencia territorial separatista. Y nun vos rir: tiempu al tiempu.

miércoles, 9 de septiembre de 2009

El día dempués.


Sí qu'hebo trepe alrodiu del acabante pasar 8 Setiembre. Nel día dempués asela'l baturiciu. Dellos analicen lo pasao. Otros escaecen cansaos.


Güeyemos de too. El que lleva a convertise nel comunicáu, artículu, movimientu previu a cualquier fecha impotante col envís de xorrascar nunes áscuares siempre vives pa prender la foguera la discordia.


Los que roblaron un alcuerdu que nos garró a casi toos col pie cambiáu y que demuestra que los partíos asturianos puen sentase a falar y hasta firmar alcuerdos ensin que'l mundu argaye.


Los que fixeron actos dixebraos pa frustración de munchos y allegría de los de siempre.


Los qu'aprovecharon la ocasión pa cabruñar na idega de la necesidá urxente y vital d'empobinar al entendimientu y la xuntanza.


El discursu paranoicu y con reminiscencies preconstitucionales d'una clase política dominante encerriscada y envizcada con reivindicar un españolismu ximielgu del que remanen aquellos amantes de los estaos uniformistes y dictatoriales.


Los que participaron nes celebraciones festives y relixoses de los sos conceyos o enveredaron camín de Cuadonga ayenos a toa celebración política. Y los que participaron de la folixa institucional.


Los que propunxeron feches alternatives a esti día porque nél nun s'afayen.


Los qu'abeyaron pela rede parándo equí y esnalando p'allá espardiendo pareceres, comentando y retrucando.


Y los que lleguemos a esti dia dempués a facer les nuestres reflexones y pescudar dayuri les de los demás. Cola cabeza un pocoñín atorollada yá de tantu xaréu y bastantes ganes d'espansionar una migayina siquiera.

martes, 8 de septiembre de 2009

Remembranza.

Pelayo, Favila, Alfonso I, Fruela, Aurelio, Silo, Mauregato, Bermudo, Alfonso II, Ramiro, Ordoño, Alfonso III.

Reinu d'Asturies.

Nación Asturiana.

Territoriu, instituciones, arte, llingua, vezos, cultura...

Identidá propia y estremada iguada al traviés de los sieglos.

Brenga milenaria.

Asturianos.
..........................................................................................................................................................................
P.D.: La identidá asturiana alcuéntrase anguaño nun momentu críticu. Recula cada vegada más y queda arrequexada dafechu. L'españoilismu ranciu identitariu anúbrelo casi too y nun dexa resquiebra pa lo llariego. Güei más que nunca échase en falta una organización cívica qu'axunte asturianos enfotaos en defender la so identidá y n'afalar a la clas política a defender los intereses d'esta vieya nación. Dende la consciencia de dar voces en castañéu, gúei nesta fecha tán simbólica pa los asturianos pido públicamente la refundación de Conceyu Bable.

domingo, 6 de septiembre de 2009

Una anuncia sorprendente.


"Esto representa un acercamientu ente'l PAS y Andecha Astur que partiendo de cero permitirá dir conociéndonos meyor y buscar les coincidencies ente les dos organizaciones pa ver qué posibilidaes hai de trabayar conxuntamente". (Lluis Anxel Núñez. PAS)


"Esto ye una amuesa mui importante de voluntá d'entendimientu ente Andecha y el PAS. Andecha Astur fizo esta apuesta táutica y entama a dar resultaos pero queda munchu trabayu, paciencia y mano izquierda. Queremos que la sociedá asturiana perciba al traviés de xestos como ésti que son posibles y necesaries otres alternatives a la política destructiva del gobiernu PSOE-IU". (Mariu Arbesú. Andecha Astur).


Esta noticia acabo d'esmesala del diariu dixital Infoasturies. Paezme sorprendente. Pa min ye mui llueu pa facer valoración dala d'ella porque me garra de sópitu. Consideré interesante ponela nel pergamín y ehí ta.

sábado, 5 de septiembre de 2009

Proceder llamentable.


Cuatro celebraciones en cuatro sitios direrentes ye lo que van facer les organizaciones que se definen como nacionalistes y asturianistes pa conmemorar esti prósimu 8 de Setiembre, Dia de la Nación Asturiana, según coinciden toes elles y Día d'Asturies pal Gobiernín.


De mano, hai que reseñar qu'esta dixebra conmemorativa truñe contra'l deséu mayoritariu de tolos asturianos que nun tán d'alcuerdu colos actos oficiales y nagüen por otros aternativos xuníos pel filu conductor común de la unidá de la convocatoria.


Dempués convién dicir que la imaxen que tala multiplicidá d'actos proyecta hacia la sociedá asturiana desprestixa tanto al nacionalismu como al propiu asturianismu cultural. Una imaxen qu'afonda más no de siempre. Nes diferencies irreconciliables, nes engarradielles eternes, y na ruindá de los resultaos que s'algamen cada vez que permedien les urnes. Ye'l triste balance que'l nacionalismu apurre a la política asturiana. Los que nunca nun pinten nada. Los que nunca nun saquen nada. Los que siempre anden a palos como nes romeríes d'antañu. Esa ye la triste imaxen y la cruda realidá.


Tamién convién recordar que'l nacionalismu asturianu nun ye propiedá privada de naide. Nin a títulu individual nin a nivel organizativu. Y de resultes d'ello somos cada vegada más los nacionalistes que nun nos sentimos identificaos nin un res con nenguna d'estes formaciones. Y non por cuestiones de tipu ideolóxicu, sinón fundamentalmente por otru que tien más que ver cola repunancia y cansanciu que nos da comprobar cómo pasen los años y se repiten les actitúes. Cómo siempre se nos ofrez más de lo mesmo. Y cómo tamién toes estes organizaciones parecen compartir, desgraciadamente, un puntu común: mostrase impermeables a cualquier suxerencia, petición o inquetú de la mayoría de los nacionalistes asturianos.


Al final vamos tener, como siempre, un 8 de Setiembre mancháu por un proceder llamentable onde naide se pue esmucir, a la hora de desquiñonar responsabilidaes. Pa los nacionalistes que queremos que se suma d'una vegada por toes esti enquistamientu na división que lleva camín d'eternizase, una fecha más pa la frustración. Como cada vez qu'acaba en frustración una convocatoria electoral. Como siempre que fai falta dar rempuestes unitaries a les mileta agresiones de toa mena que cuten al nuestru país.


En definitiva, como siempre...

viernes, 4 de septiembre de 2009

Más básico, imposible.


1) Asturianu, llingua oficial con toles consecuencies derivaes d'ello.


2) Asturies, Nación que se dota de preseos pal máximu autogobiernu dientro del Estáu.


Estes dos propuestes nun son míes. Tán garraes de la última entrada acabante publicar nel blogue de Carlos Blanco. Inxeríes nun artículu que vos invito a lleer. Pero dos propuestes a les que me sumo ya invito a sumase a aquel que les lleere.


Plantegar dalgo más básico alredor de lo que nos podamos axuntar yá nun sólo los nacionalistes asturianos, sinón bastantes asturianos en xeneral, antóxaseme imposible. Plantegar dalgo más tresversal qu'esto tamién me paez imposible de llograr.


Si, nin siquiera en dos puntos tan elementales como estos somos quien a ponemos d'alcuerdu y sestaferiar p'abrir un camín pel qu'empobinar toos y afayanos, entós val más yá matar la lluz y colar.


Qué queréis que vos diga...

martes, 1 de septiembre de 2009

Curiar la propia casa.

Naide que nun seya fatu dexa esbarrumbar la casa so. Mostrase indiferente ante les paredes arregallaes, el techu fundíu o la puerta esgonciada.

Asturies ye la nuestra casa y alcuéntrase nun estáu llaceriosu.

Hai asturianos que nun-yos preocupa nada esi estáu. Otros, pa detrás, puxen por afondar nes sos estroces quiciabes buscando una venta rápida y fácil.

Y tamién hai asturianos esmolecíos pola situación qu'esbrexen por atopar les igües que valgan pa que la casa torne a ser un sitiu afayadizu pa vivir.

Nun sé en qué proporción s'alcuentren estes tres tribes d'asturianos. Cuála d'elles algama un mayor porcentaxe de la población.

Sicasí nun paez que'l grupu de los que s'esguedeyen por caltener en pie la casa seya'l mayoritariu.

Porque l'avance pacia l'estáu ruinosu de la nuestra casa asturiana ye bien evidente. Y nun ye fácil atopar xente dispuesto a curiar d'ella.

viernes, 28 de agosto de 2009

Ye pa lo que valen.


Hora xintar. La tele puesta. Un programa cualquiera. El comentarista con una señora faciendo'l tonto. La xente rise. El comentarista rise. La que fai el bobo a costa fecha ye asturiana. ¡Vaya por dios!. Tocónos, chachu. Pienso si se reirán de les babayaes que diz. Si se reirán d'ella. O si, de rebota, se reirán de los asturianos en xunto y xeneral.


Acabo de comer y voi pal ordenador. Acullá siento la tele. Escucho cantar con voz aflautada y permala entonación el "Asturias Patria Querida". Nun voi pal cuartu la tele. Pa qué. Pa ver la xente ya'l presentador arrollicándose la risa, nun paga la pena. Pa sentir vergoña ayena tampoco.


Dalgunos ye pa lo que valen. Pa facer xirigoncia como los bufones d'antañu y facer rir. Pa que se rían d'ellos y, de rebote, de los demás. P'antroxar na comedia mientres esto s'esbarrumba cada día.


Pretendéi cambiar daqué con esti personal. Fala-yos del mileurismu. De los derechos llngüísticos. De la necesidá de tornar la dinámica d'esta tierra qu'enfila cuantayá picu abaxo...


Como diría'l playu: "Yá t'oyí, navaya".


¡Qué País!.

jueves, 27 de agosto de 2009

El güeyu l'agua y la necedá.

Hebo un tiempu onde'l güeyu l'agua del futuru esquitaba enforma. Pero los necios negárense a beber d'ello.

Pasaron los años y la fuerza del so caudal foi amenorgando, magar yera prestosu inda. Pero los necios siguíen testeriando en negase a beber.

Anguaño'l güeyu l'agua del futuru ye una pimpana qu'endagora ye a ufiertar el so filu fresquilín. Pero los necios enfótense en siguir inorando la so presencia.

Como necios que son, encerrísquense en nun querer ver que'l nuberu, enfurruscáu, pue acabar colando cola ñeve, la xaraza o l'orbayu y entós un día'l güeyu escose dando pasu al ermu.

lunes, 24 de agosto de 2009

Per Payares tien que llover y facer fríu.

...Y si l'iviernu que yá asoma pel finxu'l cielu ta pal pulgar, pues hata nevar tamién.

Ello ye que sal ún nún d'estos díes de branu con un chornazu que caen los páxaros a refrescase con unos culetinos y yá tien qu'escuchar, acabante triar el chigre, la fatada del día: "tenía que tar faciendo esti calor hasta Noviembre, polo menos". Y como nun conoces al bocayón de turnu nin tienes ganes de quimeres, pues aguánteste ensin retruca-y.


Un bocayón que pertenez a una d'eses tribes formaes por asturianos hasta la cañamina y a los que-yos repuna tolo ferial d'esti país, dende la llingua hasta'l clima.


Por ellos taríen en camiseta y chancles tol añu rustriéndose al sol como llargateses dientro d'Asturies. Pero, eso sí, cuando pinta la ocasión nun ven contradicción dala pa presumir de paisaxe verde y d'agua a embute, mientres notros llugares anden con racionamientos d'agua y una seca de meter mieu.


Paez ser que la so sesera nun tien riegu enforma (nunca meyor dicho) pa pescanciar que pa tener esi verde y esi agua'l clima de Payares o Avientu nunca nun pue ser el mesmu que'l de Xunetu o Agostu. Y si dacuando llegare a ser ximielgu caminaríamos ensin remediu hacia l'ermu y la tierra arregallao pola falta d'humedanza.


Pues esti tipu de xente arrenegao del nuestru clima yo yá lu conozo paezme que dende siempre. Como conozo dende siempre a tantu asturianu que lleva por santu y seña puñar contra lo de casa y tirar piedres contra'l propiu teyáu, yá seya contra la llingua, la música, los deportes de nuestro o la muga que fai que seyamos un país verde y atlánticu.


Y, como pa detrás, muéstrense impermeables (siguiendo colos símiles climáticos) a tou argumentu defensor de lo propio, pues ehí los tenemos al traviés de los díes, los años y los tiempos, espardiendo les sos brillantes idegues a lo llargo y ancho d'esti malfadiáu país...